立場新聞 Stand News

欽點鬧劇 七到冇朋友之啟示錄

2017/3/27 — 6:49

林鄭月娥

林鄭月娥

奶媽一如預期以過700票當選,但又邊個估到佢得票係777,三條七。「七」字被網民讀作粗口,𠵱家可用作「衝出嚟七」、「七出國際」或「七出宇宙」。今場欽點鬧劇以七冠名,可以講真係「七到冇朋友」。

要數最七的,當然係共產黨,自導自演DQ了梁振英,香港人以為終於等到改劇本改路線,點知做場大龍鳳,原來捧個梁振英2.0上場。呢個時候大家不禁要問,點解唔畀梁振英1.0角逐連任呢?換人不換路線,令到林鄭一登場就變跛腳鴨,香港更加難管治。而今次欽點搞到咁核突,薯片高民望反而落敗,連帶習大大都失盡人心,2017年7月1日可能有70萬人上街招呼佢。

第二個七,當然係新特首林鄭。卿本佳人,港英政務官出身,從來不屬共產黨系統,上屆政府一上場就成功拆除國教大炸彈。但好衰唔衰,梁振英被DQ後,佢首先爆seed,話要延續梁施政,民望開始下滑。進入競選期低B蝦碌層出不窮,八達通、廁紙、一國兩制情信,每步都畀薯片lead住行,能吏成為笑片丑角。至於選票來自西環背後威逼利誘,令建制派也反感。雖然成功當選,但就手尾好長有排搞。泛民對林鄭染紅極之唔妥,當選後林鄭要修補同泛民關係,談何容易。

廣告

第三個七,當然係唐營為首之本地工商界,表面好似好精叻,先借300+之勢夾走689,然後All in奶媽贏晒,但今次出賣薯片,出賣香港人,市民會記在心裏。唐營本來是今屆有實力之造王者,因為ABC反梁加上泛民300+,兩大陣營在選委內計埋超過600票。唐營人馬支持中央屬意奶媽,令薯片吊吊揈半天吊。因為當初為人laid back之薯片忽然熱血起來,係因為知道只要ABC唐營支持,加上泛民就可為王,所以先至衝紅燈去馬。最後唐營、李家出賣了薯片,基於各種原因棄曾保林鄭,於是薯片得票扣除泛民300票,淨低65票來自建制派。香港人對唐英年、任志剛、夏佳理一幫人看在眼裏,他們要為港人的憤怒、失望負責,愧對市民。

為薯片叔獨贏高興

廣告

第四個七,當然係西環。唔係啩?人人以認為中聯辦造王有功,自然可以繼續做其太上皇指點江山。但且莫開心得太早,偉大兼永遠正確的習近平同志,總要搵人為今次逆港人意願硬挺林鄭的失敗負責,左報、政協、人大紛紛打薯片毒針,又抬出中央不委任論,核突醜怪衝出國際,要創造和解局面,消弭今年7月1日那準備上街之70萬群眾,平息對習大大不滿無波,就要借西環官僚人頭一用,為港人消消氣。7月1日前,張曉明定必被調走,而且港澳辦將同被整頓,為過去五年不得人心施政孭上黑鍋。但凡以為今次討好西環挺林鄭之選委,基本上唔會有人找數。

咁究竟有冇人贏呢?有,就係薯片叔。他以敗為勝,知其不可為而為之,令折騰了幾年的香港人動了真情,他當上特首,共產黨提供的爛劇本,將令佢民望拾級而下,最後被人民唾棄,猶如曾蔭權,但他落敗,大家就永遠為他不值,記住他親和、真誠一面,念念不忘,必有迴響。曾幾何時,我們支持過一位候選人,他曾經有機會做特首,可惜……這就是金牌助手羅永聰所說,讓普羅老百姓記得自己(How people remember you),這才是恒久!

薯粉不要糾結,應該為薯片高興!

(文章原刊蘋果日報

發表意見