立場新聞 Stand News

武器庫? 係「環保撚」回收倉呀!

2016/2/12 — 1:27

無綫新聞片段截圖

無綫新聞片段截圖

那個單位,是「OYIF」(Oh Yes It's Free)的暫存回收倉。

如果你未聽過OYIF,你可能聽過同一個班底攪的「結束一桶專棄」,如果你未聽過「結束一桶專棄」,你可能聽過一班唔抵得資源被當垃圾的「環保撚」— 佢地六四晚會後會出動回收分類兼鏟蠟;中秋佳節傻更更實驗分拆熒光棒睇下係咪真係唔可以回收;推出「神期食物」拯救依然食得的過期食物;人地新年撈金魚佢地救金魚⋯

警方搜獲「大批武器」,阿警司叫大家齊來動腦筋:「有刀、有鐵枝、有氣槍、有口罩、有手套、有液體,我想每一個人都可以聯想,可以用來做甚麼」。

廣告

不用聯想咁辛苦,「環保撚」可以直接告訴你:辣椒油係天然驅蚊劑(查實我阿女在幼稚園也學過怎做,只不過佢用蒜頭),液體係用剩食做的酵素(唔記得定時扭蓋仲係「爆炸品」添,我家廚房中過招,液體流一地)。

廣告

至於為什麼會有刀、鐵枝、氣槍⋯⋯?我只知道:佢地拯救資源的,真係乜都會收。我最印象深刻的,是某年日青來我家探望,手信是幾pack過期的專業色板(讓孩子玩拼貼),一大包過期麵粉(加水當泥膠來玩),和一個我至今仍說不出是什麼的攝影配件(日青覺得我識攝影師多會送得出)⋯

為什麼回收倉會有這些?因為乜都有人丟囉!

有一句話叫「疑鄰盜斧」,成個倉咁多嘢,你總會睇到啲你「啱駛」的。

如果希望警察先生明白這班「環保撚」朋友的可愛,係咪要求太高?

 

(標題為編輯所擬)

發表意見