立場新聞 Stand News

毆打記者案 — 警察欠嘅唔係證據,而係廉恥

2015/5/4 — 16:24

蘋果日報FB截圖

蘋果日報FB截圖

藍絲帶暴徒涉嫌當眾襲擊記者案,咁樣大庭廣眾俾各大傳媒影到,現場咁多人證,警察都可以話冇足夠證據起訴。

袁國強仲話對動作可以有不同理解喎。

係囉,不同理解,咁我覺得應係告個記者囉,好明顯佢用原力飛條呔去綁住個藍絲隻手,想扯佢埋去。你睇佢面都紅晒,好明顯係用緊松果體發揮原力啦。

廣告

警察而家係幫緊個記者呀,你地唔好下下都當警察係有牌爛仔好唔好?你地係咁批評,學李少光話齋,咁樣又搞到警察埋伏定都捉唔到啲綁匪喇。

反話講完。

廣告

簡單嚟講,藍絲帶同警察真係最佳拍擋,以後佢地可以好似丁蟹咁打橫行架喇,真係人善人欺天不欺囉。

當全城仲嘩然緊嘅時候,估唔到事情荒謬到你估佢唔到嘅地步,《AM730》剛剛出咗個報導,話呢單案警察竟然安排認人時俾啲疑犯戴浴帽口罩!!我清晨時份睇到個報導,仲以為係重貼愚人節啲玩嘢post,點知係真嘅。

戴浴帽口罩俾證人認?咪即係個個包到好似董太咁?呢個荒謬程度真係拍得住彭浩翔嘅《出埃及記》裡面「雜差房有蛙人打犯」咁荒謬。有網友即刻諗起,呢種認人方法,咪好似《唐伯虎點秋香》咁,全部丫環用蓋頭蒙面,俾周星馳自己搵秋香出嚟咁艱難。

認人可以蒙面的話,咁下次有咩綁匪大賊,認人時警察係咪都俾佢地咁樣做?

究竟香港警察幾時開始可以無恥到呢個程度?我都好想知。大概就係主權移交之後,不斷有人俾膽佢地愈做愈放肆。

蒙面認人加埋呢張兩相,提醒所有香港人,警察冇嘅唔係證據,而係廉恥之心。

 

(明報連結截圖)

(明報連結截圖)

(AM730截圖)

(AM730截圖)

原刊於作者博客

發表意見