立場新聞 Stand News

民主派選委締連新陣線 要求參選人起碼以胡官為標

2017/2/20 — 11:41

民主政綱先決計劃,前排正中央為黃任匡(攝:朝雲)

民主政綱先決計劃,前排正中央為黃任匡(攝:朝雲)

黃任匡:搵到平衡嘅 sweet spot,就係做特首必須具備嘅條件,我相信曾俊華有咁嘅能力。

***

真普選醫生聯盟、民主進步會計師、進步工程、L5[建。測。規。園]、CoVision16、ITVision、2016ProDem21、與三名中醫代表等,逾百名民主派選委,再推「民主政綱先決計劃」。

廣告

他們呼籲候選人,如欲要他們的提名票,問鼎特首,就要力爭上游,回應他們對政改、831、23 條的訴求。

黃任匡以「獎學金」為喻。他們認為胡國興達標(必先落實政改才推 23 條、不視 831 為政改條件、徹查 UGL 事件等),故先發放第一階段「獎學金」,給 46 張提名票予胡官,以嘉表率。

廣告

至於餘下五十多票花落誰家,得看其他人能否後來居上。「比如曾俊華先生,不停講過 831 係政改框架;但到後來就比較空泛,最近係電台話有彈性。選委心中有問號,信你之前講嘅嘢好,定信你而家講嘅嘢好?曾先生要考慮點回應。」

「胡國興先生交出嚟份功課好高分。至於其他候選人點樣答至合格,攞到我地嘅票,由參選人自己思考,可以努力嘅空間好大,願意做一定攞到。」

梁家傑強調,法律界毋忘民主 300 + 的初衷,「冇人忘記三項初衷。。。大家都服膺民主 300 + 的大框架,相輔相成。呢一刻胡國興同學嘅評分最高,派左獎學金。」

黃任匡明白,策略上還有其他考量,「考第二嗰個(註:大家都知邊個)有冇獎學金呢?依個要再考慮。。。唔會一刀切,要做到胡官咁好先俾票,但希望參選人朝住依個方向繼續努力,佢地仲有進步空間,說服我地。」

關兆倫

關兆倫

關兆倫補充:「策略投票係咪妥協?依然係以原則為先。策略係儘量善用我地嘅票,令最多符合原則嘅候選人入閘。唔會為左想多啲人入閘,放棄原則,俾票唔合資格嘅候選人。」

記者問到曾俊華的民望一支獨秀,選委如何回應民意?

黃任匡說:「如果民主派選委佔過半數,控制到選舉結果,我就會直接參考民意,令選舉變成真普選。但呢一刻我地仍然係少數,所以想令一個能夠帶領香港邁向民主嘅人入閘。」

***

鄺葆賢

鄺葆賢

「胡官都冇直接講話撒回 831 架,我地唔係要候選人高舉雙手反對乜嘢。」

「係無底線接受現實,同淨識講反對中間,仲有乜可以做?胡官係一個例子,但唔係絕對,候選人要有自己一套出嚟。我地唔係要一個 model answer,我地係鼓勵候選人用自己方式,繞過目前嘅關卡。」

***

黃任匡(攝:朝雲)

黃任匡(攝:朝雲)

問:記者會未開始,已經見到網上有人批評你們。但他們都是民主支持者,謂你們「益左林鄭」、「妄顧現實」、「理想主義」等等。怎樣回應他們的不滿?

黃任匡:數學上唔成立。

先假設出閘嘅係林鄭、胡官、曾俊華。林鄭贏唔贏到,視乎佢攞唔攞到 601 票。如果佢夠票就贏,胡官入唔入閘都冇影響。

另一情況係就係,林鄭唔夠 601 票,曾俊華排第二,胡官排第三。去到第二輪投票,胡官嘅支持者,大部分都會改投曾俊華。胡官入閘都唔會改變最終結果。

***

問:但他們還有另一說法,說你們在「迫死」曾俊華。曾不能說胡官那些話,否則會被中央猜忌。

黃任匡:我地唔會期望佢好似胡官咁講,但即使去唔到咁嘅地步,仍然有空間可以進步。

如果由第一日開始,民主 300 + 的票就俾哂曾俊華,佢唔駛聽我地講嘢,繼續講 831 係基礎,力推 23 條,唔會口風軟化。我地只係希望佢再努力啲,做多啲承諾,甚至將承諾寫入政綱。

***

問:點睇民主黨與部分高教界選委,率先提名曾俊華?

黃任匡:我尊重,但唔認同。呢個唔係我嘅策略,要俾票嘅話大把時間,駛乜急呢?

你見近來曾俊華口風軟化。點解?就係唔同民主派選委,包括依個計劃向佢施壓。

其實先後次序係「計劃」公布之前,已經「通左天」,各方都知我地會先過五十幾票俾胡官,之後曾俊華先放軟口風。

民主派的三百票的確有影響力,發揮到作用,顯然緊出嚟。

點樣照顧中央感受,又攞到民主派提名,係曾俊華必須思考嘅問題。而家中港矛盾咁嚴重,搵到平衡嘅 sweet spot,就係做特首必須具備嘅條件,我相信曾有咁嘅能力。

我地睇到佢有進步,依啲咪係效果囉,講得難聽就係「成功爭取」。雖然時間唔多,但仲有十幾日,點解唔努力爭取埋佢呢?

***

現時各民主派團隊取向

2016ProDem21:7人>胡官;3人>曾俊華;17人>留待策略投票;3人>留待公民推薦結果

ITVision:5人>胡官;5人>曾俊華;19人>留待策略投票;1人>留待公民推薦結果

民主進步會計師:2人>胡官;17人>曾俊華;2人>未知

真普選醫生聯盟:9人>胡官;10人>留待策略投票

衛‧真普30:10人>胡官;20人>留待策略投票

L5[建。測。規。園]:4人>胡官;1人>未知

CoVision16:8人>胡官;8人>留待策略投票

發表意見