立場新聞 Stand News

民主黨被和解 主要矛盾打獨派

2018/3/26 — 7:08

林鄭現身民主黨黨慶(Instagram圖片)

林鄭現身民主黨黨慶(Instagram圖片)

民主思路訪京團,湯家驊同張曉明浪漫地戲劇性地在玉潭淵公園賞櫻,表面瀰漫hehe味道,實質藉機傳達一個訊息:「譚耀宗亂噏。」譚耀宗當選全國人大常委後見記者爆出支持結束一黨專政不宜當議員,一石激起千重浪,《文匯》翌日跟住上,大力呼應譚耀宗立場,DQ之網擴大至支聯會及傳統泛民,呢個係自1997以來,共產黨對港政策根本性改變。

97後共產黨容許支聯會公開活動,也容許支聯會核心領導繼續從政,條件是井水不犯河水,支聯會人士唔可以跨過深圳河搞嘢,呢個係雙方共識。譚耀宗之提法是要全面消滅傳統泛民從政機會,因為你要佢哋公開不再支持結束一黨專政,打倒昨日之我後先可由選舉主任確認入閘,冇可能,因為當他們放棄此立場,便被泛民支持者唾棄,即使自閹入閘到選舉時亦會輸。但整個支聯會及民主黨反應好平靜,只係批評譚耀宗亂噏,跟手同林鄭月娥觥籌交錯,林鄭捐錢三萬象徵大和解,政務司司長張建宗就出席尹兆堅議員辦事處開幕。旁人看在眼裏,也會狐疑究竟搞邊科!

我相信林鄭及民主黨同時通過中間人直接向北京查問,究竟共產黨中央政策是否改變,兩邊陣營當然收到風安撫,認為是有人興風作浪,然後北京再通過張曉明宣旨。問題是,究竟譚耀宗點解會犯下如此嚴重政治錯誤,而黨媒又為何冇問清楚就呼應呢?香港問題傳統以來由國務院官僚系統及在港中聯辦處理,自從梁振英登場後,人大系統插手香港事務,經過釋法之後,又多咗第三隻手,香港工作越來越混亂,而政治矛盾越尖銳,各個插手部門的地位就越重要,大家過去幾年便目睹慌死港獨不成氣候,由黨媒抬高港獨聲勢之怪現象。這亂象近期已經改變。

廣告

兩會之前,香港中聯辦主任王志民公開表示習近平對香港下達直接指示,大小事務也十分關心,由饒宗頤逝世到九巴19人奪命車禍、回信少年警訊,都由習親自批示。這說法表明香港事務只有一人說了算,乜嘢人大、國務院系統、土共西環及本地建制派,全部收工。譚耀宗又點會唔知呢?林鄭月娥冇內地系統背景馬房撐腰,絕不會自把自為,佢所做的政治工作,亦正是習近平路線代表。如果習要統戰民主派,利用譚耀宗做癲狗四出狂吠,喬曉陽等人猛吹左風,亦可理解,正所謂紅面白面,香港黑社會踢人入會早已慣用。

泛民之中以統派為主,中共目前是要對付獨派,而眾志等自決派也歸類為親獨派,打獨派是主要矛盾,中共同泛民統派就結束一黨專政就自然變成次要矛盾。打敗姚松炎、DQ區諾軒是針對自決派,而非整個泛民。但民主黨人要多向司徒華學習,多認識黨史,在中共眼中矛盾是會轉移的,當主要矛盾消失,次要矛盾就會轉化為新的主要矛盾,這時就由人民內部矛盾變成敵我矛盾了!
收拾支聯會,從來都在共產黨的agenda!

廣告

原刊於蘋果日報

發表意見