立場新聞 Stand News

江湖大佬勿做政府尿壺 守護七二七遊行是正途

2019/7/25 — 18:06

721, 元朗

721, 元朗

各位大佬,我一向好尊重大家。細佬我冇出黎行,但自細睇住《三國演義》、《水滸傳》大,古惑仔嘅戲又睇多左,上曬腦。屌你老路美,搞到我對江湖嘅事唔識都扮下識。三聯幫話事人雷公講得好撚啱,果啲當權者只會攞江湖中人做尿壺,刁里老美,有需要果陣就攞出黎用下,唔要果陣就嫌佢地臭,話係黑社會,黎手就掉,真係好撚仆街。

再講丫,當權嘅人又最撚興出賣江湖中人!做官班撚樣個個無人性架。宋朝果陣,當權者腐敗無能,治國無方,民怨四起,屌你老美,好地地一個人,都被迫落草為寇,四方豪傑就一個二個,起躲起字頭,呼朋聚義,對抗朝廷,嚇撚到朝廷賴曬屎咁,好堅架。點撚知個朝廷仲撚加古惑過啲古惑仔,一個唔該挑動宋江去打方臘!最後宋江得到啲咩丫?朝廷當初講好左一大堆嘢,幾多銀両銀,俾個咩大官你做呀,屌你老美,最後一條數都冇找!唉~ 一眾梁山好漢係俾人過一棟,威係勢咁出黎幫官府做嘢,結果呢?番黎死嘅死,傷嘅傷,散嘅散,兔死狗烹,鳥盡弓藏,諗起都淒涼。屌你老美,當權班人當你尿壼咋,利用完你之後,仲睬你有味咩?

依家香港笠笠亂,係個鳩柒政府同埋北京管治無方,自己搞出黎,班官高高在上,佢地自己衰抵俾人屌,大家就唔好衝出黎柒幫個政府擋子彈啦,自己?屎上身,有乜撚嘢著數?出黎行要計啱條數,收果雞碎咁多錢幫政府做磨心,原本單嘢唔關你事架,但就搞到全香港市民日日問候你娘親。仲有果條爛數仲分分鐘收唔番,屌你老美,成班手足有汗出冇糧出已經好撚大鑊,元朗一帶變撚左空城,個個落閘閂舖,大家冇工開,點搵食?最仆街係班死差佬反轉豬肚就拉人,好多兄弟要四圍躲。依家江湖大佬追數嘅短訊錄音俾出面啲人係咁傳黎傳去,當係笑話笑,有份參加元朗單嘢班大佬之嘅相,十八區,區區俾人周街貼,以後點出黎行?

廣告

出黎行除左要識計數,仲要講道義,唔理邊個字頭,屌你魯美,一定冇人會教啲細嘅當街當巷毆打無辜平民,唔理咩人,連大肚婆都照打。咁撚賓周都有嘅?欺凌弱小,關二哥在上,人神共滅!總之元朗單嘢,衰左又好,果日冇份落場嘅又好,都值得咁多位大佬引以為戒。

依家七月廿七日,吹曬大雞,一定冚世界嘅人走曬入黎元朗遊行。班後生仔冇得唔入黎元朗行架,佢地要話俾全世界知,唔理發生咩事,照樣遊行,照樣好似平日咁生活,咁樣大家以後先至有運行。有啲鄉村嘅叔父話,驚啲人入黎元朗遊行會走去燒佢祠堂,都戇鳩嘅!早幾年佔中佔旺,夠大鑊啦,個個瞓曬街咁,玩足幾個月,同一條街啲金舖咪照樣打開門口做生意?盲嘅都睇到啦,你唔戇鳩鳩去搞啲示威者,邊個會得閑入村挖你山墳拆你祠堂遮?但如果有人搞嘢,班後生仔講明會自衛還拖。

廣告

各位江湖大佬,唔理你平日睇開邊個區,七月廿七日星期六元朗唔單只唔好搞嘢,仲要幫手睇實個場,見有啲咩撚人咁撚戇鳩準備吹雞郁手,就幫手禁住啦。班撚樣自己衝出黎死冇所謂,但唔好連累大家一齊攬炒。黎緊仲有好多場遊行,麻煩大家都幫手睇緊啲。依家班後生仔係要出黎教訓個政府,唔係要搞黑社會。依家香港班死黑警仲加黑過黑社會,你黐埋去係有失你身份。米戇鳩俾個政府利用完你一次又一次。你同我都係香港人,班兄弟得閒果陣,咪一齊落場遊行屌柒個政府囉,黎呢啲遊行就一定冇錢收架啦,但至少唔會有人扼你應承左俾錢之後又走數,班後生仔見你行得辛苦仲會遞支寶礦力你飲,都幾撚過癮架。


 

發表意見