立場新聞 Stand News

河套區?俾返深圳算吧啦

2017/1/13 — 11:50

河套區

河套區

文:胡人傑@前線科技人員

圖:東講西讀

圖:東講西讀

廣告

 

由河套區計劃引爆出嚟嘅問題,令 IT9 徹夜難眠,因整體觀之,其實關乎香港海陸空域喺97後嘅變化,IT9 嘗試組織一下整件事嘅來龍去脈。

廣告

成個變形 condom 樣嘅河套區,來源有段故,係1997強国頒佈《國務院令第221號》乜乜乜,將香港同深圳邊界重新劃分嘅一個結果。當年香港讓出水域予深圳,令深圳可以發展鹽田港航運(搶生意),而香港理論上就換塊(又毒又隔涉嘅)爛地返嚟,香港角度去睇當然覺得搵笨實。

呢塊爛地本應送都唔要,不過竟然又有人一早買咗地段(深圳政府全資擁有嘅公司,呵呵呵),搞到有業權爭議,香港同深圳要談判多年尋求「共識」(原來國務院令係有價講嘅),而深圳角度去睇就「宏觀」地覺得公平,因為私有產權要另計(咁都俾你諗到,但國務院諗唔到),亦要考慮埋221號放俾香港大嶼山西部嘅水域,而且講到讓出航道,珠海亦都冇同香港計較萬山群島水域啦(港珠澳大橋唔係交換條件嚟㗎)。

更甚,河套區業權複雜程度可能不止於此,唔修改基本法關於香港地域部分嘅話,香港可能永遠都無確定業權(咁鹽田港水域算點先?因為唔同買地,冇人可以買海,所以冇得拗?國務院真聰明)。

221號並無提及空域,不過由三跑引爆,香港空域問題早前亦議論紛紛,唔知幾時開始,香港空域係縮咗嘅,所以三跑得物無所用。同鹽田港嘅前香港水域咁上下勁抽,香港舊空域係去到澳門咁遠嘅。整體嚟講,以前有得用,可能純粹因為人哋要嚟都冇用,所以冇爭拗,但未必一定合理,雖然合理不合理唔係三言兩語可以定奪,不過如果講空域,依家縮到香港未起三跑已經唔夠用,咁就有啲離奇。空域歷史較為含糊,還望各專家網友賜教。

呢筆糊塗賬,難怪咁多人懷念97前嘅香港,依家搞成咁,IT9 建議林鄭不如放棄河套區算吧啦,俾返深圳,換返鹽田港水域返嚟,我哋唔駛要人拆咗個鹽田港咁冇陰功嘅,係咁意,所有出入船隻向香港交付通道費咪算囉。至於空域,攞返夠香港用就得啦,我哋唔貪心嘅。當然,珠海亦可能照辦煮碗,向香港收通道費,不過無所謂喎,鹽田港吞吐量已經超越香港,net net 香港有錢賺喎,而且香港航運係退嘅、鹽田係進嘅,仲要越賺越多㖭。

林鄭咁好打,唔好晒咗佢吖,只要佢記得自己喺邊度出世、邊度受津貼教育、邊度栽培佢成高官,相信佢會同中央交代清楚㗎啦,至於深圳,叫香港馬會捐幾億俾佢哋囉,幫佢哋起個通道費清關系統,唔駛諮詢喇(最多俾十個八個假諮詢咁大把喇),唔好令中央尷尬吖嘛。如果珠海向香港學習,馬會咪俾多幾億香港起相同系統囉,馬會咁大方,35億起故宮都出得起囉,加埋10億都唔夠嘅嘢算得乜。

係喎,將原來嘅221號規劃改成咁得唔得㗎?小編有信心,俾林鄭做一定得,對香港好嘅嘢,佢不嬲都唔理原來規劃㗎啦,除咗河套區規劃團隊,西九文化區嘅老頂們係咪都好同意呢。

荒謬? 係囉,同一邏輯(國務院令唔啱睇部份可以講價,啱睇部份唔准人講價,原來規劃話改就改,馬會出錢就毋須過問,諮詢係嘥氣嘅,鄰區津貼我區生意係國策),點解林鄭手指拗出唔拗入咁照辦煮碗時,佢唔覺得荒謬嘅?

#RiverCondom #Palacegate #全部都係手指拗出唔拗入

#林鄭仲要覺得自己好英明 #香港唐吉訶德

#國務院咪成日閉門做車 #搞埋晒啲引發世界大戰嘅乜乜令出嚟

--

河套區原來規劃:本土研究社

正經建議:

● IT9 就話河套區做厭惡性行業都好過送錢俾深圳喇,今時唔同往日,香港依家只得中国GDP嘅2%,你估仲係以前嘅20%咩,仲送錢?

● 如果講科技發展,與其整多個科學園,不如叫港府 eat your own dog food

● 亦有建議河套區應該維持綠色現狀,為解救國家污染問題作出少少貢獻

● 2005年深圳都有考慮過河套區設立保育項目㗎,咪以為深圳唔識嘢先得架

/设立专门的红树林生态系统科学研究机构,对现有的红树林保护区形成相应的管理、进行红树林群落保育和栽培技术的研究与开发/

發表意見