立場新聞 Stand News

活在 matrix 嘅人類,都覺得自己做緊抉擇 所以我重申:我揀曾俊華

2017/2/3 — 17:43

過年前總公司超超超高層離開現有崗位,走去研究Behavioural Science,人類行為在這個互聯網世界中,如何被帶動、刺激,繼而作出反應,甚至做出非理性決定,實在是一個有趣的話題。我本人,從不否認是一隻minion,容易受網絡輿論影響,所以見到曾俊華個眾籌page咁有勢,亦唔執輸捐咗$100。

利申完畢,又是時候陰謀論一番。支持曾俊華的市民,目前唯一希望就是習帝DQ奶媽,否則以奶媽今日星光熠熠的造勢場面來看,薯片難以逆轉勝!我們一方面話爭取民主,但又同時寄望獨裁者可以大權獨攬,以其一人喜好,力壓港澳辦、中聯辦,呢個心理真是奇異無比!

廣告

薯片選舉攻勢,令香港人眼界大開,在一個小圈子選舉中,搞埋眾籌,當正自己選美國總統,其團隊之智慧及計謀,絕非香港班公關們可媲美。

我覺得成件事好matrix,大家活在matrix 的系統,根據系統 feed 俾你的訊號做反應,你主觀覺得自己生活緊、思考緊、決擇緊,但其實個結局matrix已經計算好,咁諗好宿命,但唔嘗試咁諗,好難解釋薯片點解會進化咗咁多?

廣告

1. 主權移交二十年,香港藍、黃、政府各大陣營,有冇出過優秀的政治人才?答案係冇。

2. 如果以擔任財政司為起點,薯片在公眾視線中已經十年,大家從來唔覺佢係一個不屈不撓,逆風而上嘅人?中聯辦出盡恐嚇勢力,如果冇靠山,唔通真係靠市民集氣?

3. 薯片今日兩招齊發,一招搵麥齊光助選,一招搞眾籌,兩招都屬兵行險着,橋嘅嘢,諗得到固然難,夠膽照行,先係最難。而且點解一個hea做財政司九年嘅人,對香港市民呢一刻嘅反應會咁準確?

4. 幕後團隊前公務員黎高穎儀、前記者等,一樣冇選舉經驗。公務員訓練,更加不會兵行險着,前明報大編輯,大記者,我當你好貼地, 寫speech 好叻,但預測市民反應,是一門科學,家陣唔係拍勵志片,冇咁多符碌,香港呢個幾千億嘅金融城市,到底誰主浮沉,你睇薯片個部署,步步棋都算過晒,到目前為止,步步都啱,香港公務員幾時DNA劇變,進化成政治人才?

於是我地又返回matrix的命題。香港人的反應、喜好,從來唔難猜測,所以話眾籌呢招真係高!!!由8964、華東水災、學民思潮、 雨傘運動到依家,香港人有一點從來無變,就係鍾意捐錢當出力, 捐錢就當參與政治。諗到以眾籌來增加市民參與感,而且唔甩碌, 一亮劍就收到近一百萬,對香港人嘅DNA真係有非常深入同透澈嘅研究。

共產黨最叻玩政治,亦愈來愈叻打網戰?大家平日見到的五毛、周融、港人港地,只係共產黨外圍嘅小丑,共產黨核心階層,掌握晒微信,微博, 淘寶等傳來嘅海量訊息,對人類嘅反應及行為,豈會不採取科學化研究及分析?

端傳媒又一篇文都講過, 共產黨網絡輿論早已年青化。呢個國家玩網, 玩到facebook 都想抄番佢轉頭。

五年前中聯辦勢力識得利用蘋果同當年未執嘅爽報,利用大量網絡製圖打殘唐英年,核心思想就是利用香港人仇富嗰份民情。今日另一派嘅勢力,係咪再進化咗,好似個本獨裁者的進化咁講,識得以假民主來掩飾真獨裁呢?

Anyway,喺matrix 嘅人類,都覺得自己日日都做緊抉擇,所以我重申,我係揀曾俊華嘅。

 

(標題為編輯所擬;作者 facebook

發表意見