立場新聞 Stand News

消費社運?

2015/5/15 — 16:15

其實部份社運人士的心態真係好值得研究。點解唔係同你做同一樣野就係膠或鬼?明明大家都支持民主,但都會睇對方唔順眼。我認為自由派本土派都有類似情緒,但香蕉奶單野,我真係覺得好離奇。佢做錯左乜?就係籌款出碟姐?你可以嫌佢唱得唔好,當然可以批評。但最多最強大的指控唔係佢唱得差,而係佢「消費」運動。即係大家最好都係無限付出,無限犧牲證明自己好真誠,好pure好true?退聯的朋友又係好多都係sell除左退聯別無所求。其實講到尾,大家都仲係用「信唔信得過」去想像運動。只要信得過,課金都冇問題。信唔過就屌到你開花。不過信唔信,首先就要證明你夠pure夠true。然後點為之pure同true?就係冇組織,冇累積,單打獨鬥,完全冇著數,咁就信得過。

用程序、理性去組織

廣告

我唔知點講,但呢種想法其實好封建、好黑社會、好反民主。「公共」、「民主」之所以厲害,就係取消左呢種「信唔信得過你」的考慮。用程序、理性去組織。理性化組織就係公開透明化,你有私心都冇用,大家睇到晒你得到乜,係未合理。即如之前字花比人話以權謀私,其實都係同一件事,就係話某D人唔可信。但字花回得好,一擺盤數出來,原來窮撚來o既,根本冇肉食。咁佢點私心都冇用啦?佢再係鬼都冇著數啦?有人覺得字花比人迫到咁好委屈。我覺得相反,就係用呢種陽光化,解除你班友D「信唔信得過」疑惑。

唔care你有幾自私

廣告

「民主」、「公共」係一套程序,講道理。我唔知你有幾多私心,你擺條數出來,我就知你拎左幾多著數,大家自有公論。鬼佬一早就知人信唔過,根本唔care你有幾自私,而係用公開方法,比人知你著數左幾多。係封建文化先咁鍾意道德化D野。因為冇程序、唔講道理,就係講個信字。其實咁就最信唔過。

我想講,追求民主、公共,要保證D人信得過,唔係要追求「冇組織,冇累積,單打獨鬥」,因為你咁樣一定輸比有組織有累積的對手。相反,係要追求更理性更公開透明的組織。逼組織者面對質疑,咁先有人「找數」。你折台,係,冇人利用你,但其實即係冇組織,冇人問責,其實就係反政治,反民主。

傳統社運都仲係講「信唔信得過」

唔好以為我只係屌緊本土派,我覺得好多傳統社運勢力其實都仲係講「信唔信得過」。好似保聯派成日話「學聯冇功都有勞」,其實都係一種「你信佢啦」的邏輯。要回應民眾的憤怒,就唔可以再用呢種方式處理,係要徹底的組織改革,令人覺得一擺出來,哦,原來真係冇著數,冇肉食,昆唔到人。出左事,知道邊個人要人頭落地。

日本人有樣野,有好有唔好,就係成日出事就由負責人自殺。係literally自殺!咁其實就係平眾怒,令組織存續,不過組織就繼續黑箱,中飽私囊。表面上係負責,其實係個別特權階級自我犧牲維持階級利益。但鬼佬因為組織透明,大家接受辭職了事。咁先係正途。

發表意見