立場新聞 Stand News

「港人講地」獲汪明荃紅館撐政改片段 陳茂波握拳激動和應

2015/5/29 — 21:49

曾任港區人大代表、身兼全國政協委員的歌手汪明荃,日前在顧嘉煇榮休演唱會台上,大喊政府政改宣傳口號「2017 一定要得」,據報道台下有部份觀眾喝倒采及喊「我要真普選!」;與特首辦關係密切的facebook專頁「港人講地」今日上載一段「率先獨家獲得」的「從未曝光片段」,指「有片有真相,究竟係掌聲多,定噓聲多,自己聽囉!」

片段可見,發展局局長陳茂波亦有出席,並在汪明荃喊「2017 一定要得」時,握拳和應。汪明荃在發言中指年青人「好好彩」,一出生已享受前人打下的江山,又指香港不可被人「搞亂」。

廣告

片段有汪明荃以及觀眾席上顧家煇及陳茂波的特寫,相信是演唱會官方錄影。

我都有啲嘢有感而發。我覺得煇哥寫咁多歌畀香港人,製造咗一個獅子山下嘅傳奇,除咗佢自己之外,亦都見證咗我哋香港呢段非常珍貴嘅年代。

諗返我自己都係,呢幾十年嚟,都係要靠自己嘅努力,自己嘅艱辛,去創造自己嘅事業, 為自己嘅生活打拼。想信今日在座好多人,都係同我同一個年代一齊成長,無論你係做任何一個行業,你都要付出,唔係個天跌啲嘢落嚟畀你。

所以我哋一定要撐香港!最緊要撐香港,我哋撐住呀!一啲年青嘅朋友,雖然你哋好好彩,一出世已經有晒咁多你哋嘅前輩、父母、祖父母輩,幫你哋創下嘅江山,但係你哋要珍惜。

(觀眾:2017 一定要得!)

2017 一定要得!(陳茂波握拳和應)呢個就係香港市民嘅心聲。今日有冇啲官喺度聽到呀?有㗎吓嘛?(陳茂波揮手)好多人會話畀佢哋聽㗎啦。

 真係㗎,我哋自己一定要撐返我哋自己嘅地方, 係咪先,唔好畀人搞亂呀嘛,我哋咁辛苦先至有呢個獅子山下,咁平安、咁太平、咁盛世嘅地方,點解要搞亂佢唧?

廣告

發表意見