立場新聞 Stand News

港鐵沉降 香港淪亡

2018/8/13 — 8:23

資料圖片:陳帆

資料圖片:陳帆

港鐵工程醜聞鑊鑊新鮮鑊鑊甘,一間代表香港衝出國際的鐵路公司金漆招牌,形象迅速蒸發,香港人集體受害。

曾幾何時,香港人係以專業倫理而世界聞名,我們不靠口號吹水,默默耕耘,以效率取勝,一切目標為本。上一次大規模工程建設,是1989六四之後的玫瑰園計劃,包括新機場在內十大核心工程,又鐵路、公路、跨海大橋、市區填海及新市鎮,仲要處理輸入外勞,政治上有北京及建制派阻撓,結果總共用咗1,500億,埋單計數仲要係比預算使少咗。

專業精神崩潰 官員恬不知恥

廣告

高鐵、港珠澳及沙中綫規模比唔上機場十大核心工程,未計豆腐渣工程,單係港鐵公佈沙中綫已超支165億元,總工程造價飆升至971億元,升幅驚人,成為全球每公里造價第二貴鐵路。高鐵香港段及沙中綫的超支金額最為龐大,埋單估計達400億元。香港人引以為傲專業倫理,蕩然無存。嚴重超支顯示工程管理一塌糊塗,港鐵工程師欺上瞞下,私自修改圖則,沉降超標當冇事,繼續施工,在在顯示專業精神已經全線崩潰,而政治上負責的官員更恬不知恥,置身事外。大家以為梁振英極左言行惡劣,未算!瞪大雙眼睇睇近兩個月港鐵醜聞,就知道梁振英五年來治下的香港,已經破壞到乜嘢程度。

港鐵工程嚴重超支,好多人歸咎於採用「服務經營權模式」建造,由政府出資委託港鐵規劃和興建,建成後由港鐵經營,這造成一旦超支要由政府找數,以往由港鐵自行融資,財務管理會嚴謹好多,超支亦冇咁厲害。前任運房局局長張炳良在任內亦表明,以上述模式推展鐵路項目,為政府帶來「深刻的教訓」。呢個教訓係乜?冇人敢講出嚟,因為高鐵係政治掛帥內地主導工程,而財務上存在極大風險,根本上市公司港鐵難以承受,財務上不可行,所以先至採用現行政府出資委託,而非傳統由港鐵自行融資的模式。至於沙中綫,十個車站穿越九龍中舊區,發展潛力低而建造成本超高,對減低東鐵及現有過海鐵路負荷有幫助,但沿線物業發展利益有限,於是惟有又係由政府磅水。

廣告

港鐵壟斷地位 隻手遮天機構文化

當年新機場十大核心工程,政府特別成立「新機場工程統籌署」全權負責,由公務員林中麟出任署長,直到機場落成啟用,再過檔機場管理局。整個工程監督系統由政務官負責,當時冇乜嘢問責官員。反觀今日,問責官員屬「一層肥膏」,無事可為,雖然坐港鐵董事局,但全無功能可言,由張炳良到今天陳帆,兩任局長都係浪費納稅人金錢。由於政府監管失職,加上其具有官方賦予的壟斷地位,上市公司財力豐厚,大量公關籠絡傳媒,港鐵公司成為獨立的冇王管鐵路王國,可以同大陸另一獨立王國鐵路局睇齊。由主席到管理層,工程總監全部養成唯我獨尊、隻手遮天的機構文化。

自紅磡站豆腐渣工程被揭露後,港鐵將心思工作放在全力攻擊爆料的分判商,又登廣告反擊,主席寸嘴到無倫,在在顯示呢間壟斷全港鐵路公司,已經爛到入心。立法會必須動用特權法,全面調查工程超支、延誤、安全及管理,拆除呢個香港鐵路王國,重建公眾信心。


(原刊蘋果日報

發表意見