立場新聞 Stand News

游蕙禎梁頌恆要懂得止蝕

2016/10/30 — 10:00

梁頌恆、游蕙禎

梁頌恆、游蕙禎

喺投資市場有個重要原則,就係止蝕,簡單講係發覺一項投資失利或錯誤時,要第一時間停損,目的係唔希望損失逐漸擴大,好多老散就係唔識又或唔願止蝕而輸身家。

游蕙禎跟梁頌恆喺立法會宣誓惡意搞事,刻意讀錯誓詞或加上粗言穢語及辱華字眼,辜勿論出發點係乜,都係錯,喺宣誓咁嚴肅嘅情況,竟然做啲咁幼稚同輕藐行徑,我諗除咗一撮激進嘅人外,唔少香港人都不會認同。

如果係咁,當有人出庭做證人,佢唔滿意呢個政府,係咪宣誓時又可以亂咁嚟,又或者學生讀宗教學校,但佢唔滿意教義,做早禱時係咪又可隨意加上粗口;啲人結婚宣誓,又是否可以隨心所欲亂講一通。

廣告

擘大眼講大話

最大問題係兩位都唔覺得自己有問題,事後仲砌詞狡辯,話乜嘢鴨脷洲英語, loser只聽過李嘉誠講嘅潮洲英語,從未聽過乜嘢香港區域英語,喺幾百萬人眼晴下講大話,敢做不敢認,呢啲議員素質極低之外,最嚴重係冇責任、冇承擔,兼夾誠信有大大問題。

廣告

可能佢哋啲支持者會話,兩人咁做係要對呢個差勁政府一個控訴,但我可以話,若你唔認同呢個議會或政府,你咪唔好參選囉;又或者英啲,在獲選後唔做,以證明我係人民支持,但因為我對中國或者香港政府唔認同,所以唔會為佢服務。倘若係咁,我對佢哋致以萬二分敬意,但𠲖家做埋啲小學雞嘅無謂行為,就令人十分鄙視。

以佢哋獲選後啲言詞行為,同搞埋啲小動作,對於改變社會或政治制度有乜嘢作用,做啲冇意義嘅嘢,對香港及市民有乜好處?我認為兩人應該認衰兼道歉,及早止蝕,否則愈辯愈令自己失利。記住,香港需要「做事」的議員而唔係「搞事」的議員。

發表意見