假才子

假才子

比較政治碩士學歷,現為傳媒工作者。「假才子」是因為現在流行才子才女,但又沒人敢承認自己是假大空才子才女,故先行澄清。文章寫得不好還請見諒,畢竟我不是真才子。

2019/6/9 - 13:20

為向自己同下一代有個交代

2019年4月28日 反送中遊行

2019年4月28日 反送中遊行

以前讀德國政治,有一個小故事不時出現:當戰後世代問佢哋長輩,成日話希特拉係壞人,咁點解當年希特拉上到台,當時佢哋(班長輩)做緊咩,跟住班前戰世代好多都冇面答下一代,因為多數都冇反抗過,甚至 at one point 支持過希特拉。

跟住又有首小詩定短文,應該都好多人聽過:起初,納粹抓共產黨人的時候,我沉默了,因為我不是共產黨人。當他們抓社民黨人的時候,我沉默了,因為我不是社民黨人。他們關猶太人的時候,我沉默了,因為我不是猶太人。他們抓天主教徒的時候,我沉默了,因為我不是天主教徒。最後當他們抓我而來,再也沒有人站起來為我說話了。

家陣條送中條例,比 23 條更大殺傷力,間接將大陸司法制度應用在香港上。23 條都仲叫係香港法官審你同係香港坐監。送中條例,係大陸法官審你同係大陸坐監,根本就一國一制啦。依個時候都唔大叫唔好,等到幾時先叫?

廣告

咩為台灣殺人案,盲嘅都知唔係啦。台灣一早講咗唔收貨,反而中聯辦鬼死咁緊張。跟住政府講法改嚟改去,最後比人問咁到底點樣引渡去台灣呀,佢哋都唔識答。真係司馬昭之心路人皆見,就係為咗提早一國一制。

遊行最後會唔會有用,我冇水晶球我唔知。講真我人生中做過咁多嘢有咩係有用,我都唔知。睇書有咩用?讀大學有咩用?返工有咩用?打機有咩用?玩 FB 有咩用?寫文有咩用?旅行有咩用?我都唔知。

又咁講,遊行冇用,咁唔遊行係去咗做咩嘢咁有用呀。上 FB/行街/睇戲/唱 K/飲茶/行山/打機,有咩用?冇用又做?講到底做唔做一樣嘢,其實就係你心情想唔想之嘛。唔想遊行咪話唔想囉,何須搵冇用做藉口?

我只知道,依個時候都唔知聲,第日比下一代,甚至自己有一日捫心自問,當時你做緊咩,我唔想答唔出。我唔要好似班商家佬同五毛廢老,比人強姦緊都唔敢大叫。為向自己同後輩有個交代,我係會發聲大叫唔好。就咁。

 

作者 Medium