立場新聞 Stand News

為我偶像紀文鳳辯護!

2015/10/9 — 15:35

紀文鳳著《女人今時今日》截圖 (1986年出版)

紀文鳳著《女人今時今日》截圖 (1986年出版)

【文:又一狂人】

早嗰陣,有人攞番中古年代嘅陳年舊事嚟做文章,話紀文鳳小姐冇腰骨,我覺得好無聊。我跟紀小姐咁耐,話晒都學咗唔少野,冇理由唔岀句聲。淨係佢嗰套「廣告包裝學」,識一半已經夠你名利雙收衣食無憂。

「千眼千手」有冇聽過呀?就係紀小姐喺政經界響噹噹嘅外號,唔係一朝一夕得番嚟㗎。咪話唔醒你,入得廣告,就咪咁傻豬,淨係諗住做廣告。兩年跳一次槽已經 out,再諗長遠啲啦。依家咩野世界呀?仲諗住靠創意開飯?做廣告,着數在可以接觸到各行各業工商地產財經政界。有機會同高層開會,唔該你咪下下講創意,耍啲公關手段岀嚟,搞好關係。慢慢,熟落到人地屋企人都識埋,老婆仔女乜名,幾時生日,唔該你集低晒。要嚟做乜?仲要問?算喇,下一位。

廣告

入得廣告,岀到位嘅,都唔少得一本著作。你文筆差,不成問題,只要手下有隻千里駒。你口述,佢代筆。作者仍然落你個名,好合理。書裏面案例唔多?可以諗計。

舉個例,某便利店初初嚟香港開創業務,雖然,個 account 係個外籍人士做,鬼叫佢唔識中文。你可以着起便利店套制服,搵日人少少,棟到正喺便利店影張相,話自己身先士卒、開山劈石、捱更抵夜,鞠躬盡瘁幫客戶諗計。有圖有真相,佢吹你唔漲(文首圖片)。

廣告

點知,撞鬼。本書出咗,一時得意忘形,全公司爭相傳閱。外籍人士不揭由自可,一揭,揭中嗰頁,是但捉住個人嚟翻譯,當堂爆煲炒鑊。你老板,想點炒吖?濕炒乾炒豉椒炒蒜蓉炒?冇咁低莊。呢條過橋米粉,就派佢去紐約總公司幾個月,等佢以為好威,趁佢一走釋兵權,返到嚟,先前做開啲客戶已經有同事接晒手。自便,唔該。

係,做老板係大晒,冇人可以差撚廚。最殺食一招就係,創意唔須要勞心,一有 creative review 就現身,指點江山。日後論功行賞,攞威攞獎,你掛頭牌,名正言順。這,是對內。

對外,所有 TV productions 一定跟到足,外面人鬼知條橋唔係你諗。你最大,於是乎又入你數。第日寫書又好,傳媒訪問又好,攬晒上身都似層層。

有人話,廣告冇得教。以上,只係我暗中觀察自學嘅筆記,如果有乜偏差,只怪我學藝不精,自作聰明,唔好入紀小姐數。築福紀小姐,明天會更好。

 

作者簡介:廣告行咁大,狂人多到數唔晒!有自大狂、工作狂、偷橋狂,仲有喪心病狂、見錢發狂。而我,濕濕碎,只係口出狂言咁簡單。

發表意見