立場新聞 Stand News

無定向喪心病狂

2015/5/18 — 7:25

劉兆佳

劉兆佳

北京對港智庫組織全國港澳研究會副會長劉兆佳吹風,指中央任命行政長官的權力是實質的,所以2017年即使一人一票選出特首亦無約束力。現舉例解釋所謂「實質任命權」;假設2017年9月特首選舉二百萬人投票,結果,林鄭月娥得九十萬票,打敗了第二位李慧琼七十萬票及第三位四十萬票葉劉淑儀,但中央也只是參考一人一票結果任命特首,即是北京參考之後可以不按照得票多少,直接任命自己心儀的李慧琼做特首,換句話說北京先至有最終話事權,推翻香港選舉結果而毋須解釋,行使劉兆佳口中所說的「實質任命」權。

大家唔好以為佳叔亂噏,早前佢話特首向中央述職,並非禮節性,而是實質反映特首向中央負責,因此述職應該規範化,即係中央規定述職內容,唔可以報喜不報憂。佳叔建議吹風後,港澳辦就正式提出特首述職要規範化。

呢個非常時期佳叔所提的中央實質任命權,將在八三一人大決定之上,再加多一重保險套,亦等如同香港人表明,袋住先方案唔止篩選咁簡單,?家唔係寶藥黨呃人,?家直頭係趁火打劫,借搞普選名義,實行收回權力之實,香港人會問,既然最終乜嘢都係中央話事,咁搞咁多嘢為乜?一時又白皮書,一時又搞出五部曲,又八三一落閘,又佔中又雨傘運動又反暴力又落區,香港人被點到陀陀擰。

廣告

佳叔就是《家有囍事》內為周星馳診斷「無定向喪心病狂間歇性全身機能失調症」病徵之四眼仔醫生,亂噏病徵包括抑鬱、自殺、冇大冇細、驕傲、當佢講到「月經前緊張」時,連周星馳也頂唔順,突然反駁:「你玩我呀,四眼仔」。如果中央毋須跟一人一票結果任命特首,即係話過去兩年關於政改討論完全係白癡亂噏,以玩謝香港人為目標。

難怪外界認為佳叔言論係踢散政改,中央有人由始至終根本就唔想香港搞普選,才有董建華、劉兆佳等接近中央權威人士,發表強硬言論,一個就指摘人「反共心知肚明」,一個就直接講明普選係一場戲,中央話晒事。另一邊廂所謂溫和派如羅致光、狄志遠、徐漢光、陳文敏等人正努力促成泛民提出修訂,從而令方案得到三分二多數支持。明眼人都睇出在政改問題角力雙方,根本唔係泛民與特區政府,而係在北京內部,大家都派出自己代理人吹風,老董佳叔自然屬「踢散政改」一派,而幕後動員溫和派以修訂方案作下台階,即係北京不會主動有讓步方案,但可以在有默契下由泛民提出。

廣告

究竟政改會否?迴路轉?形勢上睇唔樂觀,2010政改前所搭建之溝通平台,已被人用謀略拆散,而當日支持妥協之民主黨,被狙擊也失去泛民領導地位。今日所謂溫和派,本身更邊緣化、更欠政治號召力,如狄志遠仲係梁粉,佢出聲就只有反效果,根本大家講完當交差就算數。
自2012年以來,香港政局不斷撕裂,矛盾激化,早已不利中間勢力活動,加上梁振英因素,這次政改結局,其實早已寫在牆上。

原文刊於蘋果日報

發表意見