立場新聞 Stand News

(無聊)技術文:來生不做中國人,其實有幾難(幾易)?

2017/9/15 — 12:57

鍾祖康著作《來生不做中國人》封面

鍾祖康著作《來生不做中國人》封面

作者按:留意:此文並非嚴謹學術研究,亦冇任何政治立場,請務必以輕鬆心情閱讀。

「來生不做中國人」一句話,萬能key嚟,成日畀人引用,連美國人都識。呢句話來自鍾祖康同名著作《來生不做中國人》,意指中國人質素太低劣,有得揀、千祈唔好做中國人。鍾祖康呢本書已經重印又重印,印咗好幾十版,證明咗本書好受市場歡迎。

本人今世不幸成為香港人……如果今經歷完過去幾年動盪仍然覺得香港好好彩,你應該係大地主。問題係,來生做唔做中國人,好大程度唔係自己可以控制。控制到就直接改做「來生要做個有錢又有品嘅洋人」啦。咁假設你轉世投胎,過程同結果完全不能控制,最終成為中國人嘅機會究竟係幾多?

廣告

如果機率好高,為怕成為中國人咁一樣不學無術不識抬舉不知廉恥,當然要求神拜佛「來生不做中國人」;相反,中簽機率根本好低,低過阿仙奴拎英超冠軍,使乜怕? 

去量化機會率之前,要清楚「來生不做中國人」當中三個概念:

廣告

(1)「來生」:你講得來生,無可避免地涉及投胎呢個概念。「投胎」一般建基於佛教嘅輪迴。輪迴分六道、六種境界,由高級(善道)到低級(惡道)分別係:

天道(相當於信用咭中嘅黑咭)
阿修羅道(鉑金咭)
人道(金咭)
畜生道(銀咭)
餓鬼道(普通咭)
地獄道(Yes咭)

上面提到信用咭中黑咭,都有個幾得意嘅都市傳說。話說如果你有張黑咭,可以命令廣東道啲名牌店凌晨三點開門畀你一個人入去揀手袋……相比各個都市傳說(例如黃家駒變咗馬句哥、丁蟹效應),黑咭呢個都算幾撚流。作為男人我好難想像到有女人睇緊魚樂無窮嗰陣無端端想要個手袋,仲要急到等唔切聽日開門而要動用到黑咭去叫啲瞓緊覺嘅員工開門畀你。你話有黑咭可以叫三哥譚仔凌晨開門煮一碗中辣米線,或者叫銅鑼灣啲仆街的士佬唔拒截,故事嚟得更真實同有說服力囉。

又講得遠咗。六道輪迴,以往不少漫畫都用作角色嘅招式-咸豐年代嘅《聖鬥士星矢》中,處女座沙加嘅絕招,就叫六道輪迴;《火滾忍者》長門用嘅六道忍術,當中嘅六道亦取名於六道如餓鬼道。

眾生投胎之時,下一世去邊一道,根據現世造善作孽嚟決定。今世做得好事多,下世就上天道、人道;壞人就做畜生餓鬼落地獄。雖然細個喺酒店食自助餐,我亦發現好多人應該係餓鬼投胎……眾生千秋輪迴,萬世不滅。

咁呢六道嘅眾生分布(population distribution)係點嘅呢?我唔識佛祖,同眾羅漢無聯絡,更加唔識閻王,六道又無統計部門,所以無從得知六道中喺天道佔眾生總數嘅百分比係幾多、又有幾多人喺地獄。不過,以我估計,一般群組同組織中,各個種族/族群並唔係平均分布(equal/even distribution),而係金字塔式分布-上尖下闊。例如,公司一般係老闆/董事局最少人、執行倒屎多啲、跟住到高層、中層,最後嘍囉如你我通常係佔全公司最多。收入、智商、成績、利潤、財富、大波嘅女人,分布都係傾向金字塔式。

由於無直接數據,只能搵個代替品去估算分布。Credit Suisse 嘅Global Wealth Databook 2016(唔係廣告嚟),估算咗全球20歲以上嘅成年人口嘅財富分布:

資產>US$10 mn 140,949人 (0.033%)
資產US$5-$10 mn 2,487,815 (0.05%)
資產US$1-$5 mn 28,856,300 (0.60%)
資產US$0.1-$1 mn 364,998,000 (7.5%)
資產US$0.01-$0.1 mn 897,411,0000 (18.5%)
資產<US$0.01 mn 3,545,853,000 (73.2%)

當你0.03%呢個比率似乎同手機遊戲中SSR/七高星嘅角色機率差唔多……我就當眾生輪迴時分配去六道係隨機嘅,機率同上面人口分配嘅比例一樣,去天道嘅係0.033%,阿修羅道嘅係0.05%,人道0.60%,如此類推,最賤嘅地獄道有73.2%。

人類中貧富懸殊嘅分布,同六道嘅分布係咪類近?我真係唔知。眾生億萬,仲要計埋畜生,再細嘅百份率一乘埋去,乘出嚟嘅人口可能非常多,天界好撚迫。咁講科唔科學?人類嘅比例應該高啲?喂,睇返呢篇文嗰警告,ok?

「來生不做中國人」涉及嘅另外兩個概念,相對簡單:

(2)「中國人」:呢篇文嘅人喺以居住地劃分,你喺中國住,不論你係黃皮膚定藍眼睛,一律計中國人。中國人只計喺內地居住、偉大愛國情操高尚嘅同胞,唔包括喺台灣、香港、澳門嗰啲賤人,唔包習近平啲家屬,亦唔包喺其他國家嘅中國人(後者根本無有關數字)。

投胎投胎,胎者,生出嚟就成為嬰兒。根據World Bank世界人口統計,2015年中國0-5歲嘅人口約8千萬,佔全球0-5歲人口嘅12.6%。

(3)「來生不做中國人」:今世同下一世做乜嘢係幾件分開而獨立嘅事嚟(separate and independent)。你今世係豬,唔影響你下世成為天道嘅機率;今世係中國人或其他低等人種,下世有幸成為中國人嘅機率並無分別。而喺六道中處於乜嘢道,同投胎為人後會成為乜嘢國籍嘅機率又係無關。

小小計算。去到呢度,有些少統計根底嘅人已經知我想做乜;無統計根底嘅……屌你老母一早too long didn’t read 啦,你估香港人好奇心好重,好撚好學咩。哈哈哈哈哈哈。

根據上面三個概念,如果六道與及當中人道嘅國籍係隨機抽選:

-六道中轉投成為人道嘅機率約0.60%
-出世喺中國嘅機率約12.6%

「來生成為中國人」嘅機率就係兩者相成,即係0.0756%。

0.0756%,就係「來生成為中國人」嘅機率。每100萬(1,000,000)個眾生投胎,就有756個災星來生成為中國人。如果你肯定今世做嘅好事啱啱好,下世會投胎成為人類,不幸成為中國人嘅機率都係12.5%,八個中一個。

為咗等大家對0.0756%呢個機率有啲感覺,我搵咗幾個博彩項目嘅機率作比較:

-六合彩:0.0000071%(49個字選6個字單注計;1400萬分之一)

-阿仙奴成為下屆英超冠軍:4.3%(1賠23; 23分之一assuming fair bet;William Hill figure as of 11.9.2017);白禮頓為0.1%(1賠1001,1001分之一)

-美國Powerball jackpot中奬:0.好撚多個零3422(2億9千萬分之一)

-香港有真普選機會:0%

-中國人有得揀嘅話做返中國人唔做美國人嘅機率:負數

「來生成為中國人」嘅機率得0.0756%,100次都唔中一次,機率幾低。成為中國人嘅機率同香港有真普選機會差唔多。如果你怕自己投胎成為中國人,咁都應該預備慶祝香港有普選。來生成為中國人,阿仙奴都可以係雲加爺爺嘅帶令下拎英超冠軍幾次......

下世幸運成為中國人,只好講句你今世做得太多壞事,罪有應得。所以我呢幾年有意識咁去做好事,平時會扶阿婆過馬路、寧願累死都唔坐關愛座,《來生不做中國人》,我就唔係好驚……老老實實,我比較驚另一樣嘢,叫《現世中國人》。


相關數字來源:

)、(

不要問,只要like,仆街史兄的專頁同IG。

Facebook : https://www.facebook.com/Relgitsjg

IG (主要用嚟睇女仔) : https://www.instagram.com/iamuncleshit/

Project HK 專頁:https://www.facebook.com/PROJ.HK/

發表意見