立場新聞 Stand News

無論咩職業,都有權利表達意見

2019/8/2 — 16:44

圖片來源:作者 Facebook

圖片來源:作者 Facebook

我有位踢香港職業足球聯賽嘅朋友,收集咗大概 30 位來自港超、甲組、乙組、丙組球員嘅聲音,並委託我話畀大家知,佢哋一班足球員都同大家一樣,堅持五大訴求、追究警察濫權、警黑鄉勾結、以及支持所有同行嘅香港人。

可能你會問,足球員講呢啲說話其實有咩幫助?當初搵我幫手嘅朋友都係咁講:「我哋唔知咁做有幾大幫助,而且我哋又係 nobody,唔知會唔會做多咗。」聽完我好直接咁同佢講:

「係正確嘅事唔會做多。」

廣告

講真,有好多嘢做完都係冇咩幫助,就好似九把刀所講:「人生本來就有很多事是徒勞無功的啊」,但係咪因為唔知結果有咩幫助就有原因唔去做一啲你想做、或者認為係正確嘅事呢?唔通一場波未踢就要認輸?我相信佢哋一班足球員係唔會。

冇錯,佢哋一班足球員影響力好有限,喺呢場運動上未必可以好實在咁呈現出嚟,但正如哥迪奧拿所講,無論你係咩職業都好,你係有權利去表達意見。你係足球員,亦都係一位公民,你自然有權利發聲,改變你居住緊嘅地方。

廣告

而且依家嘅事態發展,已經唔單止係反送中嘅政治問題,單係元朗嘅恐襲已經演變成民生問題,即係話你就算唔理政治,你都會有危險呀!你作為人,係咪仲可以冷眼旁觀,不聞不問?

沉默,其實同縱容無誤。你有權利去發聲就應該要發聲,那怕只係一群好細小嘅力量,都唔可以抹殺佢哋重要性,因為呢個已經唔止係政治取態,又或者你係一班咩職業嘅人,而係良知、公義嘅層面,係一個作為「人」嘅應有所為。

多一把聲音,就係多一份力量。我唔知你哋點睇佢哋嘅行為,你可以覺得佢哋做嘅嘢係多餘,但希望你唔好詆毀佢哋有心為香港、撐香港人嘅動機。

 

(標題為編輯所擬)

作者 Facebook

發表意見