立場新聞 Stand News

焦土最前線ㅤ零售服務業小薯想看天被劈開

2019/8/28 — 17:33

8 月 10 日晚上,警方於尖沙咀購物區一帶清場。

8 月 10 日晚上,警方於尖沙咀購物區一帶清場。

【文:待客最溫柔】

有些人覺得內地遊客不來,我們會餓死,其實,死的是「收成期」老闆,我們這類「廢青」小薯大不了轉工、轉行,林鄭講到經濟將會差過 SARS,個天要冧呀!我倒想看看,這個黑天被劈開之後,香港會否放晴。

走進 iSquareㅤ店員說最好入嚟放催淚彈

廣告

有次示威者將至尖沙咀,花生指數馬上急升,人人熱議「去到邊?」那是一種「死喇舖頭生意點算?死喇示威者會唔會打爛我哋舖頭玻璃?」的關切感情嗎?才不是呢,根本好多人心照,示威者不傷店舖,再窮都沒有趁火打劫,例如太古廣場收容示威者多日無恙,反倒是嚴禁警察內進。

招來異變的總是警察(或警察臥底),大佬,你放一次催淚彈,成批貨要銷毀,話放就放,驚你多過驚示威者呀!不過我唔係老闆,說實話我可以有幾肉痛?進來放囉,就讓更多人知道你惡行。

廣告

花生唔嫌多ㅤ你不會知道這一行有多悶

我們不是專業人士,唔少都低學歷,靠跑數賺多點錢,日日服侍顧客,其實都惡頂㗎,同一番話、同一種態度、同一個目標(跑數),日以繼夜夜以繼日,你有時見我哋碌手機,唔碌真係悶到發慌。唔係話唔想服務你,但係亦唔想好假咁話好樂於服務你,如果唔係有一份唔錯嘅收入,轉咗工啦!

所以坦白啲,講咩唔贊成暴力、唔想香港亂嘅人入面,有一大堆人只係唔想自己利益受損,權衡輕重覺得自己嘅錢比香港民主自由來得重要,但對於食物轋底層打工仔而言,我們損失的比例可以嚴重到咩程度?作為有份上街嘅人,我最驚係拉咗會俾黑警打死、坐好耐監、中彈同無命咋!

對社會無貢獻ㅤ所以玉石俱焚?

唔係我哋放棄香港,而係政府放棄我哋呀!你睇示威者唔只一次捨命相救其他示威者,示威者條命是政府、黑警及其支持者覺得賤,我哋自己從來係珍惜珍重,成場運動發揮嘅戰術、速度、創意、堅毅、團結、全方位、跨階層都一級棒!就因為獨裁政府而被拖死、被消滅、被捕至最後一兵一卒呀,呢啲本來就係貢獻社會、改變未來嘅力量呀!

所以最後想講嘅係,雖然好多舖主呢期叫苦連天、好多舖頭的確生意死哂,但係既然政府以致縱容暴政嘅沉默大多數唔珍惜我哋群眾運動的潛能與力量,咁亦唔駛旨意收割我哋要我哋做牛做馬、唔准 Facebook 講呢樣講樣!

我哋係打工仔,唔係奴隸。

If we burn, you burn with us!!!

 

延伸閱讀:光復旅遊業 — 資深旅遊業前線反駁林鄭

#打工仔唔係奴隸
#反送中
#五大訴求缺一不可
#YouBurnWithUs

勞工組 Facebook

發表意見