立場新聞 Stand News

煙幕,冚唪唥都係煙幕!

2017/1/24 — 6:52

曾俊華、林鄭月娥

曾俊華、林鄭月娥

鬍子叔叔正式落場,近日唔少支持民主嘅香港人,都喺度講緊一定要俾票鬍子叔叔,如果唔係,俾數字女士2.0做到特首咁就死得喇。有時事評論員重鬧爆話如果有泛民選委唔撐鬍子叔叔搞到佢選唔到特首,就一定要票債票償!唉,中曬伏喇。

不才想講,唔好以為呢場選戰,係2.0女士鬥鬍子叔叔,又或者係西環鬥北京,咁諗法,實在too simple。

呢個選戰,超級詭異。大家不妨回吓帶,幾個月前,鬍子叔叔本嚟行情看漲,大家有眼睇,呀習某唔只一次主動同鬍子叔叔握手,鬍子叔叔又有個舊同學做緊呀習某身邊嘅財金紅人,八月尾開始某份左報又突然生果上身係咁狂數西環,再加埋北京吹嘅和風,同埋未來幾年大陸同國際形勢嘅分析,大家都估鬍子叔叔就係呀習某嘅心水底牌(1)(2)。之不過,過去兩個月,奇奇怪怪,大量嘅紅燈「消息」,又辭職辭唔到,大家ngaau爆頭,究竟搞乜呢?

廣告

坊間大多數嘅分析,都係放喺一個西環鬥北京嘅framework去諗,但係,好多呢啲嘅解釋,根本就唔多通:

(一)西環同北面權鬥:我就咁睇,呀習某最凶險嘅權鬥日子都應該過咗啦,相比起過去呢幾年俾佢砌低嘅紅色老虎,依家西環同埋乜辦物辦班友,好似都只係算蛋散咋噃。依家啲人叫呀習某做「習大大」,其實我覺得係錯別字,應該寫「集大大」至啱,因為佢咩權都集於一身。以佢咁集大大,兼且出手都好狠吓,佢要郁邊個就郁邊個啦,西環班友可以點同佢鬥呀?如果話西環盤踞咁多年搞到啲利益已經盆根錯節,唓,就係咁先至要襯特首換屆一鑊鏟起佢啦!咁多年嚟咁多利益瓜葛,要黑材料郁佢哋有乜咁難呀?單喺香港報紙曝咗光嘅都已經唔少啦。所以權鬥未分勝負呢個解釋,不才覺得唔係好啱。

廣告

(二)呀習某未有決定,俾佢哋跑吓遲啲先再揀:呢個我真係唔信。呀習某咩權力都要去曬自己身上,咩都直接由自己去控制倒,以呢種權力欲、控制欲咁重嘅人嚟講,佢點會俾香港班友仔喺到搞嚟搞去,搞到咁上下,重要有可能係搞到一pet屎咁先嚟睇吓最後搵邊個做下屆香港特首呀?好唔配合人物性格囉。況且香港未來幾年重有唔少剩餘價值,無論走資定係對付美洲嗰個奸商總統,香港都重有個重要角色喺度,呢啲咁戰略性、牽涉佢個紅色黨咁重大利益嘅嘢,呀習某又點會唔係自己決定曬,兼且一早布定個陣出嚟呀?

(三)呀習某想引蛇出洞:呢個係幾好笑。根本成班人都係蛇鼠一窩,如果呀習某放曬手唔理,由得西環猛咁吹雞狂捧2.0女士係想引蛇出洞,咁佢就會見到成棚建制友都會出曬洞,咁做,differentiate唔到邊個係所謂忠心定唔忠心喎。

(四)假傳聖旨:喂,依家呢個世界好似有得上網囉喎,而且啲所謂嘅假「聖旨」都曝曬光見曬報,呀習某派幾條友坐喺北京個office度睇吓香港新聞,乜鬼假「聖旨」都傳唔到啦,重可以俾你假傳傳足兩個月?傻的嗎?

不才認為,今屆特首選戰嘅詭異現象,其實一啲都唔奇怪,因為呢個係操盤人呀習某布嘅陣。煙幕,冚唪唥(編按:港東話『冚罷難』之正寫,即全部、所有之意)都係煙幕!

你睇吓,喺家陣香港嘅傳媒氣壓底下,一份左報竟然可以發咗顛咁喺度由特區呀頭鬧到西環呀頭再鬧埋乜辦物辦呀頭,而又竟然鬧咗將近半年都重生存到,兼且俾佢鬧到傻嘅兩份西環左報都重係對佢好斯文,喂,西環兩份左報平時少少嘢都鬧人鬧足九條街啦,竟然俾人臭罵都可以無乜反應?由此可見,呢份生果上身嘅左報佢嘅後台係有幾咁硬。而奇就奇在,將近半年喇,都重係得把口,喊打喊打,「遲啲你哋就死,你哋想瞞騙聖上你哋一定死,死死死…」講到口都臭。喂,真係權鬥嘅話,片走咗數字先生,重會俾你有機會搞啲咩假傳聖旨呀、逼宮呀咁咩?呢個後台,事實上喺度不斷揼波鐘,好明顯係做緊台戲,扮個紅臉白臉呃觀眾囉。

呢個迷陣,搞到個個香港人都變曬奴才咁款,日日顧住猜度好似至高無上嘅呀習某嘅心意,兼且引到香港人覺得眼前嘅亂象全部都係西環班搞屎棍喺度作惡整出嚟,令到好多香港市民,都好期待有日會見到呢個至高無上嘅人出手打瓜嗰個大家鯾唔落嘅2.0女士,鏟除曬啲數字路線。咁到第日揭底牌,真係鬍子叔叔喎!香港蟻民就會好感激皇上恩典,皇上英明神武,七一齊齊上街高唱“Ha---lle-lu-jah! Ha-lle-lu-jah! 榮耀歸於習帝!”

重有,正如不才上一篇文所講,呢個陣係要喺個選戰沙蟹局入面挾民主陣營show hand,打心理戰。你哋咁驚2.0女士,咁我就刻意將鬍子叔叔嘅表面形勢撳低,再由得西環班友將2.0女士捧上天,嚇到你哋瀨曬尿,咁我咪可以偷到你雞囉。大批本嚟撐民主嘅香港人可能唔駛鬍子叔叔俾到咩民生或者民主進程嘅承諾,都肯收貨,猛咁撐佢,之前民主陣營贏得咁漂亮嘅嗰三百幾票,通通得票無所用啦。而且,民主陣營入面嘅人有排拗,邊個進攻鬍子叔叔質問佢政改立場邊個就會俾自己友鬧得好慘,民主陣營分分鐘因為內耗而蝕水。呢一招,好毒。

大家唔好唔記得,數字先生落場,數字女士上場,鬍子叔叔表面氣勢大逆轉,呢啲,通通發生喺民主陣營喺選委會投票前後嘅嗰個時段。試諗吓,民主陣營當其時嘅強勢,對北京嚟講,就係真正要打擊嘅對象。情況就好似兩年半前咁,87個催淚彈催出一大棚香港人好堅咁走上街頭同佢抗命,民主陣營形勢大好,咁北京咪派人落嚟操盤,用盡各種招數,紅臉白臉黑臉青臉乜都出齊,目標,就係要打散我哋香港人撐民主嘅氣勢。

依家果選戰,就好似你去個商場入面搵餐廳食飯,你以為有A餐廳B餐廳C餐廳好多俾你揀,以為佢哋互相競爭搶緊你呢個客呀?其實佢哋背後咪又係同一個大集團大老闆。無錯,西環班友聯埋2.0女士依家係出盡飲奶力想爭個特首寶座番去,之但係,呢班友最上面嗰條線,即係呀習某,根本就唔係同呢班下線嘅友仔鬥緊搶客,佢呢個大集團主腦係同我哋呢班食客鬥緊呀!佢要繼續氹班食客入嚟個商場度食飯,要食客俾好鬼貴嘅錢食咗餐號稱做爛市益街坊嘅特價飯,俾佢斬咗一頸血之後重要以為自己執到。

咁雖然我都非常之同意去呀鬍子叔叔開嘅餐廳食飯,係點都好過2.0女士嗰間,之不過,本嚟我哋去鬍子叔叔嘅餐廳食飯,係有本錢要求佢俾番份營養好啲、味道好啲嘅嘢食嚟,而唔係求其入得口鯁得落就算喎,咁點解我哋要俾你搵老襯,俾你㩒住嚟搶呢?

五年前,香港人俾嗰個紅色地下黨員數字先生偷到雞,過咗我哋一戙,咁就玩足我哋五年,重搞到我哋應該今年就有嘅真普選都唔知要等到何年何月先至有。今年,唔會又俾呀習某偷到雞,又再過我哋一戙呀嘛?香港人,真係咁好呃?

P.S. 唔想親朋戚友俾人呃,麻煩將呢篇嘢share出去。提高警覺,小心騙徒。

 

(1) 呢一篇都幾正:鍾祖康《為什麼習帝看中曾俊華?

(2) 其實重有其他文嘅,可惜不才搵唔番,朋友麻煩自己search吓,search 到唔該喺度share吓。Thank you!

發表意見