立場新聞 Stand News

爆一次大鑊

2016/2/15 — 10:57

【文:Mr. M(網友投稿)】

最近,聽得最多嘅兩條問題係:

1. 點解香港變成咁?
2. 香港將會變成點?

廣告

第一條問題係 why ,而個 when 大家心照 - since 1997。

廣告

第二條問題呢?真係問緊 how? 依我嘅觀察,大家其實係問緊 when,因為大家都預期只會越來越差,到最後嚟一次好似六七暴動嘅總爆發,問題只係幾時(when),2017?

呢種「預期」普遍存在喺唔同陣營、界別、階層。無論激進本土、温和泛民、愛港愛國愛共愛名愛利愛權人仕、維園阿伯、甚至牛頭角順嫂都有類似呢種「遲早爆大鑊」嘅預期。當中有啲人好擔心,有啲人卻好期待。除咗嗰啲期待藉此宣洩積壓已久的怨氣,或者抱住終須會有一次的想法嘅人之外,仲有一啲人是期待藉住「爆大鑊」撈一筆政治利益。

無論如何,當一個社會大部分人都預期會(就算唔係期待)「爆一次大鑊」時,唔係好恐怖嗎?

這又回到第一條問題:點解香港變成咁?呢個咁,並唔係指有幾千人竟然瞓街佔領交通要道兩個幾月、唔係指任命個副校長竟然搞到又衝擊又罷課、唔係指警察竟然同市民「打」成一片、唔係指黑社會打人警察竟然唔拉、唔係指以百億計公帑竟然尷硬通過 etc,而係指「爆一次大鑊」竟然係集體期望。

就好似一個本來健健康康正正常常嘅人,捱下捱下捱到週身病痛,竟然唔係期望自己食下藥休息下好番,而係期望遲早爆單大野入醫院,死唔死得到時先算,點解會變成咁?!
 

發表意見