立場新聞 Stand News

特區第三世界賤招:公就我贏,字就你輸

2016/7/29 — 11:33

梁天琦,圖片來源:朝雲 攝

梁天琦,圖片來源:朝雲 攝

政府搞咁多完全違反法治精神同程序公義嘅嘢,似乎係針對梁天琦。用政治主張去剝奪一個候選人參選權,呢樣嘢完完全全係霸王硬上弓,根本就係第三世界獨裁政府手段。

而家政府出僭建嘅確認書唔work,就用模稜兩可嘅手段要候選人答email,擺出唔答就可能被取消候選人資格嘅姿態,呢招真係好賤。賤在當候選人唔可以緊急JR到呢個違反程序公義做法嘅時候,最後要同政府玩show hand,一係就死都唔屈服,搏政府唔敢取消候選人資格,一係就用晒所有司法手段之後,屈服住先搏入閘。

政府呢個做法嘅賤格位係,佢就係要公又佢贏(唔怕你JR,就係夾硬取消你資格),字就你輸(要獨派點都要受袴下之辱搏入閘,從而令獨派光環減弱,而且分分鐘都係取消你資格),同時仲可以製造本土派裡面派系嘅矛盾。

廣告

成件事嘅最後防線就係JR,但JR過程會好長,政府亦會用公帑同候選人玩到上終審法院。司法制度雖然都已經係爛船,但都有三根釘,可能仲有些少希望,不過成件事,佢唔俾你選,選完,就當JR結果係政府終審敗訴,可以重選,咁都已經玩謝你。坊間仲有一個講法係分分鐘會人大釋法,話政府做法係合憲,如果係咁,香港真係死得,民調話近四成十幾至三十幾歲人支持港獨,到時應該會變七成。

有人問,梁天琦而家都話自己唔支持港獨要搏入閘啦,咁同熱普城有咩分別?分別就係梁天琦唔會Day 1就簽,然後自己五個候選人做法講法都有唔同,仲要落井下石批評港獨派會變新泛民浪費香港三十年時間。梁係用盡司法手段,打到最後,然後響最後一刻以悲情姿態說明自己點解要屈服,成件事基本上係兩個層次。

廣告

呢個時候,自稱本土派嘅候選人同泛民候選人都要諗清楚,萬一政府真係要剝奪梁天琦參選資格,你地應該點做。

發表意見