立場新聞 Stand News

特首候選人都不敢說的土地問題

2017/2/14 — 15:53

背景圖片由作者提供

背景圖片由作者提供

又過一個秋冬,我日日望住呢幅地,又曬多年太陽。

呢幅係前灣仔已婚警察宿舍地皮,唔記得邊年完全清拆,但空置至少五年應該有。由2010年到2014年,都吹風話賣呢幅地做酒店,搞下搞下又未賣。

有報導指因為連灣仔內有8幅分區計劃大綱圖(OZP) 被JR緊,一堆賣地計劃凍結緊(註1) 。咦,JR會影響政府賣地咩?咁石硤尾延坪道綠化地帶被改劃成住宅,都係被小市民JR個決定,政府照樣賣地啦。以上堆OZP因為係啲業主地產商JR高度限制,所以就唔講唔講hold住晒。哦,明晒。

廣告

本研社成日講嗰幅旺角豉油街上海街交界、多年短租做緊露天停車場O既地,都係同樣原因未賣。雖然我唔同意需要成個區各地皮發展都凍結,但事實上政府就係咁縮,縮又唔敢講。政府尤其最大粒嘅行出來講,點解永遠只係串啲人為保育阻發展,而唔會提呢啲事情。

我其實唔係好支持呢幅地做酒店,都唔係好想政府快啲賣呢幅地做酒店。唔賣住喇,咁點解唔可以拿出來做住臨時房屋?用組件屋,幾個月搭好,俾數百人中途住住先,唔係德政咩?一直有唔少民間團體諗緊各種臨時房屋計劃,希望有關當局接納,萬事俱備,只欠合適地皮。要問地政租地,地政問返你邊位,有無政策局支持,原來市民自發送橋俾政府都係要搵個大佬照住先成事(無package無碼頭,點做都無行)。

廣告

呢塊地位處灣仔駱克道,周圍雖然係商業區,但夜晚啲人放晒工,同臨時房屋居民唔會好大衝突。點解政府唔肯?擺鐵馬擺好幾年就最善用土地方法?(咁又係,灣仔都多示威,整治示威者點都重要過為基層提供一塊瓦遮頭) 。

林鄭話當選後,會與社會宏觀檢視土地來源。Come n, Carrie, 不如你解釋下呢幅地點解擺鐵馬都唔開放出來?林鄭好熟書嗎?最熟就係包庇政府,defensive之典範。

嗱,鬍鬚之前作為政府一部分都唔好得去邊。

發表意見