立場新聞 Stand News

特首暗戰白熱化

2015/7/6 — 8:58

亞投行習握手事件,是繼689搞民生連任工程後,另一位候選人鬍鬚曾入沙圈度步,比大家睇睇毛色,至於另一人選曾鈺成,就率先陷入醜聞門,繼WhatsApp斬頭式攻擊行動後,又一單涉種族歧視言論,沒完沒了。當大家關注重慶大廈黑人是否真有能力對付佔領人士之際,忘記了曾鈺成另一大動作,成立智庫倡議公共政策。自政改否決前後已經有三堆人馬匯聚,首先去年老董牽頭成立香港團結基金會,今年則是政協常委唐英年的江蘇社團聯會將香港上海幫組織起來,另一堆是湯家驊、陳祖為溫和泛民陣營,?家再加埋曾鈺成新埋班,究竟有乜因由呢?

香港當然唔需要咁多政策研究,跨界基建、兩地融合有內地規劃,重大民生政策如全民退保、標準工時立法,政府冇民意授權好難擺平利益矛盾,完全係政治問題,同政策研究無關。智庫其政治功能,應該同特首選戰有關。當泛民、傳媒及公眾仲關心年底區議會及出年立法會形勢,忘記了更重要嘅選委會選舉,後政改最重要嘅政治角力,會轉移至反梁挺梁之爭。第一戰當然係選委插旗戰,建制內以政黨名義難在選委選舉中擴大勢力,因為不少界別唔想政黨壟斷,而席位眾多,容易流失令到中間偏泛民選委有機當選。

如果用智庫名義,打住公共政策倡議者之旗號參選,一來可以插旗,擴大自己陣營手上掌握的選委票,做真正造王者,同時亦可擠走泛民及其友好選委。今次千二人小圈子有上次經驗做先例,各方都不敢再掉以輕心,尤其是689已手握公共權力,要搞人黑材料易過借火。上次選舉真正鐵杆梁粉少之又少,如果冇幕後配票畀佢入閘,連提名票都唔夠。大家仲記得傳統鄉議局勢力唔肯支持689,先至有小桃源飯局出現。而家劉皇發代表傳統鄉事又再被迫退,甚至傳出要佢交出立法會議席,力捧新界社團聯會一系取而代之,呢一系乃過去幾年挺梁力量中堅,可見特首「暗戰」早已開波。

廣告

如果今次選舉再度淪為抹黑內訌、建制內互相動用斬頭式黑材料攻擊對方,香港政局更不可為,社會更可動盪,下一任特首未登場已全身毒箭,民望低殘,管治力量渙散,邊個上場都冇法管治。如果北京聰明,應該知道不可重蹈覆轍,所以應該會及早就人選拍板,做好部署,以期下一屆政府能有足夠民意支持,至少唔會一上場就變跛腳鴨。

從此大局觀之,習握手未必是偶然,而是北京及早部署的先兆。至於曾俊華會否被搞黑材料,就看北京能耐了。

廣告

刊於蘋果日報

發表意見