立場新聞 Stand News

特首選戰嘅沙蟹局

2017/1/23 — 11:43

曾俊華、林鄭月娥、葉劉淑儀、胡國興

曾俊華、林鄭月娥、葉劉淑儀、胡國興

今屆特首選舉就好似一場沙蟹局,大家都想揭對手底牌,尤其係呀習某嘅底牌。

無咗數字先生呢個人民公敵,民主陣營依家雖然坐擁三百幾票,但似乎正陷於困局。不才主觀地認為,這正是習某嘅布陣,而民主陣營拆解嘅一步係要全力與其中一個玩家對撼。

講沙蟹局之前,先要談一談民主陣營參與今屆特首選舉搏奕嘅目標。目標簡單歸納如下(唔鍾意睇呢段嘅朋友請自己跳跳跳):

廣告

(A)揭穿現有選舉制度嘅荒謬
(B)爭取到實質改變
(C)贏取民心

(一)揭穿現有選舉制度嘅荒謬:呢點基本上係無意義嘅。香港人俾呢個小圈子選出嚟嘅特首蹂躪咗咁多年,如果到今日依然唔認為選舉制度荒謬,你估憑住小圈子裡面有人投白票或者民主陣營候選人喺電視論壇上罵幾句,就可以改變?Too naïve喇。況且,當你鬧小圈子選舉荒謬時,對手就會乘勢「講啲唔講啲」大罵民主派反對政改方案令到幾百萬香港人無得一人一票選特首,然之後,又是一輪泥漿。麻煩別浪費彈藥。

廣告

(二)爭取到實質效果:主要兩方面,第一,民生、經濟、社會等領域嘅發展,簡稱民生;第二,民主進程。爭取民生議題納入政綱成為當選承諾,係所有正常選舉必須要做嘅事,不過,香港嘅選舉並不正常,由數字先生嘅例子可見,給你天花龍鳳嘅承諾,但佢轉頭「講咗當做咗」,喺制度上你依然奈佢唔何。之但係,爭取民生議題納入政綱,民主陣營依然要做,一則五年後特首競逐連任時可跟他算一算承諾走樣嘅帳(慘!要等五年,唔連任就煙消雲散),二則,係有關下一個目標贏取民心,下段詳談。至於民主進程,雖然唔容易,但呢個係今屆民主陣營嘅共識,其重要性相信讀者亦甚明瞭,不贅。

(三)贏取民心:贏民心,或者倒轉講,不蝕民心。之所謂民心,亦分兩類,第一,係令市民心裡覺得民主陣營能夠代表我去揀一個我想揀、或者代表我絕不去揀一個我極不想揀嘅特首人選;第二,係令市民心裡覺得民主陣營所講嘅有道理噃、民主陣營所堅持嘅核心價值好重要噃、民主陣營所搞嘅我都有份參與噃!要推得動下一波嘅進擊,只有靠贏取民心;無咗民心支撐,不論今屆或下屆,想取得任何實質效果都係妄想。能贏取民心,就唔可以只集中選擇民主陣營認為最重要嘅嘢,而係去了解廣大市民認為對佢哋重要嘅嘢。因此,納入一啲實質影響民生、影響香港健康發展嘅政策議題,絕不能喺今次選舉中被忽視,相反,應該借助呢啲市民「入肉」嘅議題,再透過過去五年嘅爛個案去突顯制度上嘅不建全,同埋建制派嘅不可靠。一般市民諗嘢唔會諗得咁抽象,甚麽選舉制度呀、程序公義呀,有時太高層次喇,由市民所了解嘅生活事例去入手、用市民聽得明白嘅生活用語去講嘢,其實更有力。重有,真正贏得到民心,其實係要俾市民有參與,令市民感覺到自己有份,兼且俾你尊重。

講咗咁多,依家講吓個沙蟹局。

民主陣營喺上月中選委會投票前氣勢如虹,曾被議論為有能力「造王」,因為對方陣營內最有實力嘅兩名候選人如果勢均力敵,民主陣營就成為關鍵少數,有機會為香港市民爭取到多啲實質效果,並從而獲得市民嘅認同與支持,覺得民主陣營「做到嘢」。要令民主陣營失去這「做到嘢」嘅優勢,最有效嘅方法就係將建制陣營內嘅候選人睇起嚟形勢懸殊。

數字先生做嘅陰質事已經太多太明顯,有佢出現喺競選論壇,民主陣營必贏盡民心。喺陣前先將數字先生用完即棄,換來另一位數字女士2.0,再將這位同樣會做陰質事但包裝得比較好嘅2.0女士捧上天,那就可挾民主陣營show hand,因為,好多較年輕同埋較認同民主理念嘅市民早已看穿2.0女士嘅陰質面,絕不想佢上場,呢類市民有啲會寧可無太多民生或者民主進程嘅承諾,都好希望民主陣營嘅選委會代表佢哋投鬍子叔叔一票。到底係要民心,定係要爭取民主進程?到底要按市民嘅意願去取得民心,抑或係帶動市民去認同民主理念以強化民心?左右為難。民主陣營內人人底牌不同,show 邊張先至好?如果傾唔掂數,又再一次墮入內耗,重覆又重覆敗喺紅色政權最擅長嘅分化技掚之中。習某可能正在:哈哈哈!

不才沒有「消息人士」,不知習某嘅底牌意屬何人,但不才主觀咁胡思亂想,認為,無論對手底牌係2.0女士還是鬍子叔叔,民主陣營都應該全力進擊,將目前貌似形勢大好嘅2.0女士嘅表面風光掃走,係減低show hand 壓力嘅一條生路。此話何解?

如果2.0女士係底牌,未來五年香港人就要捱盡苦頭繼續被蹂躪,咁民主陣營就理所當然應該盡快將其面具拆穿,而若然能夠喺沙蟹局裡俾普遍市民看清2.0女士嘅面相實為數字先生,民主陣營就有機會贏得更多民心。

如果鬍子叔叔係底牌(其實我相信佢係),2.0女士就係被用嚟撐一撐場、過一過橋,好讓鬍子叔叔成為表面弱勢,可以喺支持民主理念嘅市民群入面繼續集郵,集吓集吓,分分鐘集得較民主陣營更多,鬍子叔叔都唔駛點應承啲咩對民主進程嘅承諾,都有大把本嚟支持民主嘅市民去撐,待天機到之時,鬍子叔叔挾著成為打救香港核心價值唯一候選人嘅姿態,再配合來自北方吹出佢就係習某意屬人選嘅「消息」,今日話唔支持鬍子叔叔嘅左派人士會有個人意志唔肯歸邊?咪傻啦!到時,呢啲奴才票會番番嚟,商界票會湧俾佢,再加埋支持民主嘅市民嘅民意,贏曬啦!咁好多香港人就會快樂迎七一,榮耀歸於習帝呀!

民主陣營嗰三百幾票?有票等於無票啦。民生民主咩都無乜進帳,民心,亦都無進帳,如果一個唔留神,分分鐘倒蝕添。要破局,除咗要搞公民提名公民投票之類嘅東東去俾市民有參與、有個場合去增強一啲公民意識同埋自主意識之外,係有必要打破鬍子叔叔家陣弱勢嘅呢個現象(或假象),進路,就係打破2.0女士嘅表面強勢。

點進攻?不才認為,無端端從天跌到西九嘅嗰個分館,會係民主陣營用嚟破局嘅契機。觀乎數字先生俾市民鬧到爆、民意支持度非常「唔得掂」嘅幾個事件,包括反國教、HKTV發牌、機場行李門,同埋橫洲公屋發展,其實都有一個共通點,就係唔跟政府處事嘅正常程序兼且做啲不合民情嘅事。今趟分館事件雖然缺少咗令市民直接感受到「關自己事」嘅「入肉」元素,但好明顯係超級唔跟正常程序,踩界踩得好厲害,隨時「瀨嘢」。

現時,好似只有《眾新聞》同《傳真社》同《明報》喺度繼續揭、繼續追問,而猛力追擊呢件事嘅民主派議員好似亦為數唔多,不才想喺呢度向民主陣營建議一吓,除咗內部拗餐死拗邊張做底牌之外,記住搵辦法一齊集中火力向2.0女士發炮呀!要同香港市民一齊贏呢場沙蟹局呀!

 

(本文曾刊於17.01.2017《眾新聞》)

發表意見