立場新聞 Stand News

特首選戰 推理拆局

2017/1/25 — 18:21

有讀者朋友見不才上一篇文講鬍子叔叔係呀習某嘅底牌,就以為不才係鬼,係喺度叫人投白票曲線撐數字女士2.0。哈!大家去睇番不才第一篇文,就會知道不才係唔鼓勵投白票,重去呼籲民主陣營要重炮強攻數字2.0呀!唉,大家睇文,唔好淨係去諗鬼唔鬼而唔點樣去理人哋個分析同論據先得架。

各位提出批評指正,不如提一啲不才嘅分析有謬誤同埋唔完善嘅地方,又或者講一啲你自己嘅觀點,咁,大家睇文寫文先可以真係有交流有進步家嘛。

廣告

不才嘅分析,係一種推測,實質證據當然無,有既話,晨早就跣俾傳媒爆佢大鑊啦。不過咁,每一個局無論裝扮得幾咁似,都總會留底一啲造假嘅痕跡,只要將呢啲線索放埋一齊,再去仔細推敲一下,係可以幫我哋去推測到個真相。不才以前鍾意睇松本清張,咁依家就用推理嘅方法,再扼要講多次不才對呢個選戰局最關鍵嘅兩項推論。

(一)數字2.0唔係呀習某會揀嘅人。線索:就係嗰份生果上身嘅左報。呢份左報由舊年八月開始就係咁狂數亂港四人幫,到上個禮拜數字2.0正式落場起跑,呢份左報又即刻用頭版狠批數字2.0「獨斷厚顏官僚賣港」,跟住又起佢底鬧佢「根在英國心在權力」。呢份左報屬於習某旗下,不才有合理嘅假設習某或習派係有能力控制呢份報紙,唔會俾呢份報紙鍾意噏乜就噏乜。咁如果呀習某嘅心水係同西環一樣意屬數字2.0,佢根本就唔會由得旗下嘅呢份左報喺度日日數臭西環同埋未來佢會揀嘅特區呀頭。所以,呢份生果左報嘅存在,就已經反證咗數字2.0無可能係呀習某想揀嘅人。

廣告

如果你重相信呀習某意屬數字2.0,唔該講個合理少少嘅解釋嚟聽吓,點解會出現生果左報呢啲咁顛喪嘅玩法。而且,再推論落去,數字2.0不單只唔係習某依家嘅心水,亦都唔會係習某依家未揀定但諗住遲啲有可能會揀嘅人選,因為只要數字2.0有機會成為未來特區呀頭,習某或習派亦會制止呢份左報對數字2.0嘅抹黑,現實上係無可能出現生果左報呢個怪象。用邏輯反證嘅方法,係可以幫我哋喺追查真相嘅過程入面,先排除一啲關鍵嘅可能性。

(二)依家唔係權鬥勝負難分,係呀習某刻意喺呢段時間任由西環將數字2.0捧上天:線索:近呢一、兩個月,話中央唔撐鬍子叔叔撐數字先生/數字女士2.0呢類「消息」滿天飛,不過每次消息出咗隔無耐,又總會有新「消息」話中央並無/並未有咁嘅決定。權鬥喺大陸當然好普遍,不過,就apply唔到喺呢個選戰case。話權鬥,係講緊西環或者江派想捧數字2.0上台,而習某或習派就想捧鬍子叔叔,兩派依家鬥緊,勝負難分,所以民主陣營嗰三百幾票係可以幫鬍子叔叔打贏數字2.0。不過你睇真啲,依家個局面並唔係講緊某啲選委撐西環、某啲撐北京,而係個個建制派選委都知道北京嘅習某大權集於一身,個個都喺度測度緊究竟習某想揀邊個。啲建制選委根據上屆嘅經驗,好清楚知道成個特首選舉,到最後係呀習某吹雞由佢一人一票揀出嚟,佢哋依家人人都「等埋習叔」,準備定一知道習叔嘅心意就即刻鬥快撲出嚟撐習叔要撐嘅特首候選人。

近呢一、兩月,幫數字2.0造勢嘅謠言滿天飛,如果真係權鬥,咁習派只要即刻派人向香港班建制友傳話,清清楚楚俾個signal佢哋要向鬍子叔叔靠攏,咁就已經可以潰散咗敵對派別嘅計謀,呢個一啲都唔難做。但係事實上,無咁做噃。呀習某點解唔咁做呢?佢唔咁做,一就係佢無知到咁交關,敵對派糸喺度亂吹吹足兩個月都重係懵盛盛,一就係佢無能到咁交關,就算知到咗都無辦法派到心腹為自己傳話。不才唔會認為習某係全知全能,但係點都唔會無知無能成咁掛?呢兩個假設都唔成立。咁理論上重有第三個可能性嘅,就係佢無為囉。但係權力鬥爭緊都重可以咁無為,咁hea做?呢個假設亦係唔切合現實。剩番落嚟,就係推論習某係明知而刻意容許呢種情況發生(甚至主動令到呢種情況發生)。

綜合上面兩項推論,習某係刻意容許西環班友將呢個佢根本就完全唔諗住會揀嘅數字2.0捧到上天,而且,呢個並唔係習派同乜辦物辦嘅權力鬥爭,而係習某刻意經營嘅布局,呢個布局嘅效果,就係使到數字2.0喺呢段時間睇起嚟形勢大好,相反,鬍子叔叔就睇起嚟形勢極差。

上面第一項嘅推論,事實上係顯而易見,大家好可能都曾經諗過,之不過,諗完又唔敢相信。尤其係見到數字2.0個勢咁猛,有咁多建制派嘅人都話撐佢,唔通呢啲人唔識睇個局勢咩?唔通數字2.0自己又唔識睇個局勢咩?

不才咁睇:建制派嘅人利益掛帥,個個奴才心態。同西環關係最密切嘅個批,見西環咁樣叫到咯,逼到埋嚟,佢哋信又好唔信又好,咪照樣做住先,應付一下依家重有權力嘅西環友,到第日如果見到風頭轉咯,咪即刻又再轉過囉,好出奇咩?建制陣營入面,梗係有啲人睇得明呢個局啦,例如前主席謎語先生,佢咁識猜謎,點會睇唔穿?咁佢即使睇得穿,亦都要繼續佢嘅任務,繼續幫佢嘅上線放風傳話,話俾香港人聽今年特首選舉中央唔會「欽點」,又話中央家陣唔出聲係要避免俾人話操縱選舉。佢咁講,你咪咁聽囉。不過聽嘅時候,記住要分得清邊啲係北京專登放出嚟想整暈你嘅煙幕啦。

至於數字2.0,就更加容易理解。當一個人野心太大,好想好想做特首,咁佢見到數字先生被落台,西環友轉撐佢,佢點解唔試?搏得到,黃袍加身,搏唔到,咪最多番英國祖家食長糧。你同我就話會怕黐埋去西環班友度整臭自己啫,數字2.0呢啲咁膽自大嘅人,臉都唔要,佢重有咩嘢輸啫?

有時,一啲大話俾人講得多,太多人講,啲人又講到似層層,咁你本嚟唔信,慢慢都會唔敢唔信。呢啲,就係宣傳機器嘅威力喇。

有讀者朋友留言講,就算呢個真係一個局,咁又點喎,我哋都無得揀;唔揀鬍子叔叔,到時白飯都無得食或者要食屎咪重死。又有讀者朋友問,咁可以點先唔俾人呃吖?

各位朋友,呢個世界唔係淨係得0同1架。不才梗係唔會傻仔到,以為拎住嗰三百幾蚊就可以要求鬍子叔叔間餐廳俾份A5和牛嚟,但係如果話咩都無得揀就算數,咁鬼宿命,咁我哋當日咁辛苦去投票玩呢個小圈子選舉嚟做乜呀?上個月選委會投票,民主陣營贏到開巷,好幾個專業界別全取fight低曬啲建制倉,咁我哋又咁開心?大家咁辛苦,大勝三百幾票之後又咁開心,都係因為我哋知道,就算係難,我哋都想去改變,想喺呢個咁鬼扭曲嘅選舉遊戲入面繼續同佢鬥過。

重有,如果齋諗ABC,咁之前好多選委候選人都係嗌呢個口號啦,例如魔童電視基,咁你又係咪揀呢類候選人吖?上個月嘅選委會投票結果,係好多呢類齋嗌ABC嘅人贏唔到,而開宗明義講換人換制度,講要有真普選嘅人就大勝,呢個就反映咗,香港好多人已經唔係港豬,唔想俾人哋耍完我哋五年又五年,大家係好清楚知道要繼續爭取個真嘅普選制度番嚟,香港先至真正有救。各位朋友,唔好俾人哋嘅宣傳機器搞幾搞,嚇幾嚇,我哋就自亂陣腳先得架。毋忘初衷呀!

不過,大家又唔好以為我會話,無真普選嘅話啲票就千祈唔好俾鬍子叔叔喎,如果民主陣營嘅選委咁樣諗咁樣講,即刻中伏。因為,即使你同我都睇穿咗呢場煙幕迷陣,但係依家絕大多數撐民主嘅香港人都係相信數字2.0贏面高,你夠膽講一句話必定唔俾票鬍子叔叔,甚至乎只係係咁咦批評佢幾句,你都必然會即刻俾同路人圍插,死無葬身之地。不才講嘅中伏,就係指達到咗呢個布陣嘅目的,令民主陣營內耗,民心蝕水。

相反,如果依家嗌破喉嚨咁公開呼籲一定要俾票鬍子叔叔,唔俾嘅話就票債票償,咁做,亦都係中伏。因為,數字2.0本身就唔係習某杯茶,本嚟想要爭取真普選換人換制度嘅香港人,依家都唔再嘈咯,全部肯乖乖將之前贏得嘅三百幾票無條件奉上。又俾習某偷到雞,個政改又可以無風無浪再拖多五年。兼且重要幫埋未來特首製造民意強勢,等遲啲將會擺出打低亂港四人幫英明神武姿態嘅習某,可以喺七一典禮上面講:「依家香港一國兩制你話幾好!個選舉制度你話幾好!咁樣選係可以選到一個眾望所歸、受香港人熱烈歡迎嘅特首呀!」咁,重唔係伏?

你可能會話:左又中伏,右又中伏?即係點呀?撓埋手乜都唔理牙?

咁又唔係。知道咗呢個係一個局,咁大家就要識得有策略咁去玩,唔好中佢地雷。呢段時間,唔好將個focus放喺鬍子叔叔度,唔好攻佢批評佢,亦都唔好撐佢猛話俾票佢。正如不才第一篇文所講,民主陣營依家嘅攻略,應該係一齊集中火力全面向數字2.0發炮,務求撕破假面具,打破佢家陣嘅表面強勢。呢個進攻,可以有兩方面。

第一,就係將數字2.0嘅真面目揭露,用嗰個西九分館又好,用佢亂噏嘢涉嫌違反選舉舞弊條例又好,又或者用佢啲離地蝦碌笑話又好,總之撐民主嘅人一齊圍剿佢,將佢嘅表面風光掃低,最好掃到佢嘅民望插水插到同數字先生差不多。

第二,就係將習某呢個迷陣嘅真面目揭露,呢一點,唔係話走去鬧鬍子叔叔同習某同流合污,千祈唔好咁講,鬍子叔叔喺個陣入面有無主動嘅角色,唔知,亦都唔駛理住,大家只需要將我哋眼見嘅,再加埋個推論分析,去提醒民主陣營同路人提高警覺,唔好俾個煙幕整暈以為數字2.0真係形勢咁掂,唔好再俾對手玩到我哋。不才忍唔住走嚟寫呢幾篇嘢,都係咁解啫。

重有乜其他嘢可以做?大家一齊諗吓。不才諗到嘅嘢,下篇再講。

 

(註1) 如果想知啲建制選委點諗,可以聽吓呢段田北辰嘅訪問 (2:13開始)

(本文曾刊於24.01.2017《眾新聞》)

 

發表意見