立場新聞 Stand News

獨立自主 冇大冇細

2016/2/19 — 13:50

立法會新界東補選本土民主前線候選人梁天琦(左)及立法會新界東補選公民黨候選人楊岳橋(右);圖片來源:d100片段截圖

立法會新界東補選本土民主前線候選人梁天琦(左)及立法會新界東補選公民黨候選人楊岳橋(右);圖片來源:d100片段截圖

【文:章為群】

號稱「行公義,好憐憫」嘅網台,攪咗個2月28日新界東補選論壇,7個候選人剩係得兩位打擂台。屬於傳統泛民公民黨嘅代表係楊岳橋,新興香港本土先鋒係梁天琦,壁壘分明。兩人雖然爭奪相同目標,新界東立法會補選議席,不過,主張就有「打邊爐同打屎窟」之別。

傳統泛民主張,自然係以「和理非非」嚟做主打,加埋「讓愛與和平佔領中環」、「公民抗命」同「雨傘運動」,再加碼落區「深耕細作」,就算係進步咗啲架喇。總而言之,就係君子動口不動手,保持理性與克制,對中央特區政府信守「一國兩制」仍然抱有希望,尋求通過討論協商,解決問題。

廣告

泛民仲主張顧全大局、和民眾緊密聯繫、懷抱道德情操、對追隨者負責任,以及不會作出違反社會大眾利益的行動。楊岳橋今次參選,其實都係為咗幫佢師傅補鑊,等「保皇黨」、「建制派」嗰啲享有既得利益嘅集團,唔可以「隻手遮天」全面控制立法會,「上下其手,無所不為」,將立法會同大陸嗰啲「人大」、「政協」睇齊,淪為「橡皮圖章」、「舉手機器」。

畀公民黨話係「領導」旺角騷亂嘅本土民主前線嘅梁天琦,主張就幾乎同泛民「反晒底」!佢話自己都曾經係泛民嘅擁躉,參加過泛民主催嘅爭取民主運動。之不過,用晒「理性」、「和平」、「討論協商」、「非暴力」、「公民抗命」種種抗爭策略,十幾年落嚟,香港民主嘅進程、人權嘅狀況,有目共睹,講多嘥氣。如今,連人身安全都響起警報,大陸公安維穏,可以越境執法,話係中国人嘅都可以當蟹咁紮。所以,係時候諗下新辦法。

廣告

梁天琦話對中央政特區政府同「一國兩制」都唔會再存希望,主張「無底綫嘅勇武抗爭」,遇到「執法者」武力或暴力對待,會採取「對等武力」,務求「撼動社會和政府」,實現香港民主自治。所謂「無底綫的勇武抗爭」,講嘅係信奉者無底綫的付出和犧牲,包括為咗實現理想「冇咗條命」!梁天琦唔認為自己係「領導」,參加抗爭嘅都係成年人,自己作出判斷,自行負起刑責,唔使望人幫佢發達。

 

「各行各路」,「條條大路通羅馬」;

「眾生平等」,「自求多福」,唔使人地代勞同負責;

自己頭,自己砐,砐甩自己安;

置諸死地而後生,好過船頭驚鬼,船尾慌賊!

 

作者簡介:退而不休的老師

 

發表意見