人在中環 - CK

人在中環 - CK

我係一隻又笨又固執嘅豺狼。著有《人在中年》。

2019/9/9 - 12:38

「班示威者繼續搞落去,係會搞死香港」?

中環站(立場新聞圖片,2019-9-8)

中環站(立場新聞圖片,2019-9-8)

某個c9朋友話,班示威者繼續搞落去,係會搞死香港。

世界好多大都會,喺歷史裡面都發生過好多大大小小嘅社會動盪同混亂。結果佢哋都冇死到;結果佢地繼續係國際大都會。

亂係有時限,亦會過去。一個城市發生亂象,最後死與唔死,取決於政府對待亂嘅態度。精明嘅政權可以透過這個契機,洗心革面重新出發,將堆積下來嘅問題重新正視;邪惡嘅政權則會剛剛相反,繼續指鹿為馬,繼續製造更多矛盾,利用混亂嘗試去擴大和鞏固權力。前者會讓城市變得更強,後者,正如那些人所講,會搞死一個地方。

廣告

亂係一個過程,始終都會有完結嘅時候。只係「亂」本身唔會搞死一個地方,政權如何處理民怨,選擇疏導還是鎮壓,才是生死嘅關鍵。

一個城市唔會因為爛咗一堆入閘機、交通燈、玻璃窗而死去的,當手持權力嘅政權,與及手持武裝嘅紀律部隊,再冇可以抗衡佢地嘅勢力存在於這個地方的話,這個城市,就真的會被搞死了。

係呀,如果香港真係要死,係會咁樣死去的。

作者 Facebook