立場新聞 Stand News

現在究竟是誰在領導警隊

2017/2/23 — 18:13

2.22撐警集會,陳祖光、譚蕙珠等人在台上拍手支持警員

2.22撐警集會,陳祖光、譚蕙珠等人在台上拍手支持警員

剛才聽電台,警察員佐級協會代表陳祖光不承認昨晚是集會,堅持只是一個內部會議,所以無需申請不反對通知書。

不過有三萬幾人,其中有大量非警務人員喎!有人站台喎!有叔父級人馬出來發言喎!好心啦,搵個好啲嘅理由,唔好做啲咁低水平嘅辯解。以後如果有人出嚟遊行唔申請不反對通知書,係咪可以話係內部會議?

同青年新政兩位被奪走議席的後生仔講完「支那」兩字後辯稱是「鴨脷洲鄉下話」不是同一個邏輯嗎?喂,青政兩人就俾人搣柴,仲要俾立法會追數。你哋就繼續揸槍揸住胡椒噴霧。

廣告

揾人出嚟講嘢,可唔可以搵個質素高啲嘅。一路我都以為,香港近二十年招聘的警員,學歷與個人質素都比以往有所提升。但以佢哋D代表近期嘅表現,不禁要質疑這一個講法。

再咁搞落去,只會丟人現眼,只會加深警民對立。咁搞落去可以得到咩結果?法庭會唔會因為咁,係上訴過程中判七警冇罪?顯然很困難。

廣告

唔通咁搞落去,特首真係會特赦七人?果真如此,暴動到此。

加快「辱警罪」立法?唔好轉移視線啦!而且就算有咗辱警罪,如果警民關係繼續惡化,你多樣嘢製造衝突。

不如立法話警察打人無罪仲容易啦!或者立法授權警察用刑,嚴刑迫供,睇吓點!

痰餵豬話有銀行家話咗,「七兄弟」一出冊,即刻請晒佢哋。佢嘅意思係咪即係鼓勵警察盡管打人,冇有怕,打完人仲有好工跟尾。呢啲咪叫做煽動囉。照計,特區高層應該出嚟譴責佢添啦。

如果一個在判刑當天在發出那封信的時候加多一句,「香港警方作為專業嘅警察隊伍,唔會容許警員違法違紀行為發生。個別警員嘅行為唔代表整體警隊」,就算唔道歉,事件都不致如此升溫,事情亦都不致會受別有用心的人利用。搞到今日,根本就唔係一哥在領導警隊,而係被警隊下邊那些質素咁低嘅員方代表及組織騎劫了整個管理層。而這些員方代表又被那些別有用心的政壇叔父(婦)挑撥。

依家個局,根本就係呢班建制嘍囉,利用七警事件,乘機進一步挑撥離間,加深警民對立,以達到佢哋搞亂香港嘅目的。這個根本就是梁振英政府及其支使者處心積慮嘅圖謀。警察甘願受到挑撥,最後結果只會令自己由亞洲第一,所謂專業警隊,變身大陸公安及城管。

有時真係覺得好難過,回歸只係20年,香港警隊竟然比呢班人帶領向倒退40年嘅方向走。

發表意見