立場新聞 Stand News

現時前線抗爭究竟需要什麼?

2019/8/14 — 12:44

作者提供

作者提供

經過琴晚散水問題及多方討論,相信大家都開始會謹慎 D,無咁容易傳信息。

自劉業成回警隊做二哥後,警方的行動策略明顯有所改變。反送中初期警方的執行方式大多是「佈陣->長期對峙->瘋狂放催淚彈->放到某個煙霧彌漫的滿足情況下,先出黎包抄及追打開始被打散的示威者」,我稱之為「催淚放題 + 復仇追打模式」。

上星期開始,警方開始不用「催淚放題 + 復仇追打模式」,改為「突撃包抄拘捕及遠距離射擊」模式。舉一個前日的例子。警方唔同你玩長久對峙。當佢地決定突撃,就會放(十)幾枚催淚彈,然後就立即衝前拘捕示威者,由放催淚彈到衝前拘捕示威者之間的時間距可能不到一分鐘,換言之,示威者基本上要預催淚彈一黎,就要應付隨即而來的警方拘捕行動。咁仲不特止,警方會從後方包抄,而且包抄方法唔係之前引你後退到某個「安全」位置後,再慢慢推進去你既新位置圍你,而係當你面對前方拘捕行動一向後路跑時,警車就會突然駛進你既逃路,隨即「跳車」黎捉你。至於仍然堅持留低既勇武之士選擇暫時守住某個位置「還撃」,警方就會直接用槍擊(橡膠彈或布袋彈)攻擊,直到示威者為了躲避子彈開始後退或散去,警方就會衝前拘捕。

廣告

因此,我必須提醒大家,而家決定上前線發夢既朋友,係必須預左要受傷同被捕,因為個玩法已經完全唔同,無得好似以前咁,可以慢慢走、有勇武之士護住自己撤離。去到前線,一定要預左跑,全速咁跑。如果完全唔想承擔任何受傷或被捕風險,就唔好上前。但咁咪不預「和理非」參與?的確,任何行動升級本身就會提高「和理非」參與成本,我地要預左。如果「和理非」真係好想好想上前,就盡量搵D近一個月發夢上過前線有經驗既朋友一齊,聆聽佢地既建議,佢地既「經驗」唔係白來的。

******************

廣告

而家前線要唔受傷或被捕,係要克服幾個難關:

1. 警方的「突撃包抄拘捕和遠程射擊」模式,除非諗住硬碰硬死過,否則幾乎無解,只有跑(快閃)的份。

2. 警方而家會肆無忌憚衝入地鐵、商場、私人地方拉人打人放催淚彈,所以要注意走入依 D 地方未必再安全。

3. 警方派出「卧底」,依招好難拆。無錯,我地可以根據某些特徵「捉鬼」,但警方應該好快就會學精去隱藏各種「我係鬼」的特徵。「捉鬼」難度極高,而且形成長久的「捉鬼」風氣,好容易造成誤中副車同分化。「卧底」既影響力唔單止係令我地害怕突然被「黑衣人」拘捕,更加係增加我地彼此不信任,製造消息混亂,拖慢現場的行動節奏和破壞團結。

其實原則上示威者本身就無咩可能打得贏警方,我地做既只可以盡力減少己方陣營的成本代價。所以,

(一),陣地現場一定要有遠程哨兵負責不斷提供各個「離開路線」的環境,因為而家警方由後路突入既速度太快(唔再係以前既從後推進包抄),哨兵要離陣地夠遠去觀察,咁先可以提供真正有效的情報同時間比前線離開。

(二),唔好再以為入地鐵及私人地方就必定安全,因為警方會衝埋入黎打人捉人甚至射撃。如果選擇走入地鐵,一定要夠快,快D上車。如果警方真係殺晒入黎好近,係月台既樓梯口位度要有最勇武決定「犧牲」保護大家離開既人去擋。

(三),現場可以繼續留意有無「警方卧底」,但除非對方有太明顯特徵顯示好可能係警察,或者疑似警方卧底的人聚集埋一齊,否則唔好亂咁放料比消息CHANNEL,搞到人心惶惶,又不能確認真偽。我建議你一係遠離對方,一係就現場公開質問對方,要對方顯示清白。對方無法證明清白,就影佢相傳比哨站Channel,然後趕佢走。

******************

咁前線究竟要咩信息?

一,唔好傳信息黎話幾時清場。現場既人唔係盲的,而家大多數前線亦唔係新仔,佢地有經驗去判斷警察幾時清場,幾時應該走。沒錯,即使好似機場依D比較特殊既環境,其實大部分發夢前線都有一直留意點走。

二,當然現場可能有好多新仔,無咁既經驗。所以我上面同大家,我強烈建議和理非、新仔如果而家要去前線,最好結伴同行,而且果個「伴」係有經驗既前線。咁新仔或和理非應該接收咩信息?我依篇文有講,依度只略提一二,大家有興趣就睇:

「根據過去的經驗和機構的報道手法和態度,將手頭上的消息機構進行「可靠度」的排序,從而判斷消息的可信度。若在 TG 裡,可以把最可靠的五個消息頻道置頂在對話表上;盡可能加入更多群組和頻道,擴大自己消息機構的範圍,然後運用「多方認證」的方法加以確認,但避免陷入多方消息原來不過是出自同一來源的陷阱; 認識自己也是消息發佈者。在傳遞信息時,應盡量謹慎,提供信息是出自哪個信息機構和指明信息的可信度;假如消息是虛假的話所造成的公共風險(例如造成恐慌混亂或社群分化的機率)愈高,就愈應該謹慎發佈或傳送消息。」

三,前線真正需要、最寶貴既信息係「各個後路而家情況點,有咩事發生時可以確保安全撤離」。而其實有經驗既前線收集依樣信息一早就有門路:一係佢地自己小組GROUP,二係佢地長久相信既消息或哨站 CHANNEL,三係直接看各大媒體既現場 LIVE 判斷。因此,佢地唔太需要其他的消息來源,或者話根本唔應該依賴其他信息來源,因為果D信息好可能都係流料,或者誤報。

四,發夢前線其實真係好憎「散水黨」,雖然大家都係出於好心同擔心。我早前都講過,現代戰爭打既最重要係信息戰,而且警察的示威警務早在幾十年前已經視「信息戰」為重要戰略目標,對家一定會用方法截取己方陣營的信息,製造謠言、進行各種分化、消息夾真夾假難以辨別。所以,我地真係要好謹慎好謹慎對待信息,包括要警惕自己發佈或轉發某D信息會否造成誤報或分化。早前我都有篇學術文講到,有研究威權社會下抗爭歷史的學者指出,一個簡單的信息、爭論就可以造成我方陣營「致命級別的分化」。

==================================
利申:上面純粹學術研究,不鼓勵任何違法行為,你懂得的。

作者Facebook

發表意見