立場新聞 Stand News

田北俊與田北辰

2016/11/29 — 11:56

田北俊(左)與田北辰(右)

田北俊(左)與田北辰(右)

【文:李開步】

睇新聞,新民黨個田北辰竟然開聲寸自己個主席葉劉淑儀,話立法會議員嘅職責係監察政府,所以黨主席唔應該兼任行政會議成員。就咁睇,佢似乎係為咗撐大佬田北俊,早前批評自由黨現任主席張宇人唔應該接受689任命為行政會議成員。但大家都知呢兩兄弟一向不和,點解田北辰今次咁好死撐大佬呢?

我咁睇:香港政圈一向有好多兄弟班,好似廖長江、廖長成,曾鈺成、曾德成以及李國寶、李國章。呢三對兄弟都有一個共通點,就係都先後做過行政會議成員。偏偏第四對,即係田北俊同田北辰「跛咗腳」,得大佬做過,細佬就恨到出面都冇得被欽點。

廣告

睇背景,田氏兄弟同上述三對都係親政府,而且喺政壇上都好有影響力。田北辰更加係全國政協,眼見連廖長江都入到行會,得返自己冇得入,你話佢係唔係覺得自己好冇面,驚死人話佢廢柴,所以諗住搶咗葉劉個行會成員嚟做?

但好老實,即使葉劉唔做,689唔通又一定會搵佢?呢條友一向養唔熟,又自以為是,又乞人憎,689都係醒目仔,點會搵呢啲二世祖入去搞亂檔?

廣告

我諗接近政圈嘅人都會收到風,話田北辰同葉劉好唔啱牙,將會另起爐灶,依家已經做緊嘢。佢同人意見唔同,要走,情有可原,但話晒合作咗咁多年,好嚟好去呢啲咁簡單嘅道理都唔識,就知呢條友幾咁反骨。不過佢都唔係第一次,當年佢大佬喺自由黨咁睇佢,打算培育佢做接班人,結果咪一樣反面走人?

其實佢份人囂張成性,成日擺老細款,難合作,好多人都知。例如佢以前有個助理叫趙恩來,當年係佢心腹愛將,亦師亦友,但結果點呢?上年區議會選舉,趙恩來親自去田北辰個愉城選區參選,擺明界佢票;同一個情況,今年立法會選舉,有一位候選人叫張慧晶,其實喺上一屆2012年立法會選舉,係排田北辰名單第二位。結果今屆就反過來挑田北辰機,去論壇時仲吓吓啄住田北辰。由此可見呢個二世祖平時待人有幾差,令個個都要出嚟反佢。

試諗吓,假若搵佢入行會,佢唔同意某啲政策,自己走出來亂講嘢,話自己唔負責唔同意,咁試問個行會有乜後果?

所以話,即使葉劉唔做行會都好,以田北辰過往個底咁花,689都係唔會搵佢入去。要搵,搵個唔知記者要開會嘅容海恩入去都好過佢啦。

至於佢大佬田北俊,雖然好多網友好buy佢,但睇佢近日點批評張宇人,就知佢同細佬一樣咁自以為是。佢話政黨主席唔應該做行會成員,但當年佢自己又唔係做自由黨主席同時又做行會成員?因為當年佢轉軚唔支持廿三條立法,先走去辭行會成員。既然佢都做過,點解又唔可以俾張宇人做呢?

講嚟講去咪又係因為佢係ABC,驚死自由黨會撐689連任囉。如果佢咁驚,今年立法會選舉佢就應該出嚟選,攞返張特首選委票,而唔係推個牛奶仔出嚟,結果連唯一一個直選議席都輸埋。自由黨係建制派,但你唔妥689又唔妥到出面,結果成個黨越嚟越走下坡。張宇人做咗主席後,即刻同佢劃清界線,話ABC只係田北俊個人意見,好合理喎。始終建制派係要阿爺祝褔,冇祝褔,咪等收檔囉。

政治呢樣嘢,又要有權有勢,又要戴頭盔置身事外,邊有咁著數架?

所以話,呢兩位田少都係算把啦。尤其係阿二少,不如你趁依家立法會要補選,順手辭埋個立法會議席再選過,睇下冇左阿爺關照你,你會唔會嬴得返?

 

發表意見