立場新聞 Stand News

癱瘓機場阻旅客 不如堵塞貨運中心

2019/8/15 — 14:36

2019.8.13, 機場

2019.8.13, 機場

【文:三不】

以下係本人親自撰寫對近日機場示威及局勢看法,以及對未來抗爭路上嘅建議。

作為一個曾經做過大型物流公司嘅空運部職員,我想提醒大家唔想搞到旅客,其實大可以堵塞貨運中心,如 AAT,AFFC、HACTL、super-terminal 等等到機場一段路,即駿運路、駿坪路(希望有物流司機可以補充路線點封先最有效)。因我係負責空運出口規劃出貨,所以全條路線唔算熟,而且離職很久了,部分詳細流程真係有遺漏請多多包涵,不過運作我可以肯定係無變。

廣告

每批貨大概係起飛前 3 個小時要由貨運倉轉出去機場經安檢上機,大致十個鐘前會安排定貨件點砌、走邊班機,包括係香港轉口或出口嘅貨物,所以行動只要封到一兩個鍾就已經可以令幾十班機延誤或停航。

如果全機都無貨情況下,航空公司寧願唔飛,因為只係有客無貨,連成本都賺唔返。可能好多人唔知一班機主要收入係貨運,唔係旅客機位。如果上唔到貨,咁佢地就會自動取消航班,而且明面上示威者唔係癱瘓機場,一來無違反禁制令(有待法律資詢),而只癱瘓汽車道路情況下,旅客仿可坐機鐵入去,咁樣唔會阻到旅客同一般市民去旅行。不過前提係航空公司肯蝕住飛,如果唔飛,都唔可以怪得我地呀。

廣告

呢個係好絕嘅做法,第一,唔需要得失旅客之餘又令大公司付出代價,包括背後需要收發貨件嘅公司,可以話所有行業都無一倖免,特別係用得空運都係貴貨,或保鮮時間短嘅貨品。因為物流鏈會嚴重影響好多大企業。包括貿易、零售、生產。

第二,香港作為世界第一空運站,所以可以講得上對香港經濟打撃好大,甚至影響到全球物流鏈,而大部分成本都係由大企業,大公司承受。如果大家查下,曾經我地個機場試過營運混亂問題,導致好多貨濟留機場,最後好多都需要報銷,包括好多海鮮,魚生,雪藏貨,食物等等。

呢個行動中,勇武可以去封路,和理非可以靜坐馬路,既搞唔到旅客,又做到最大效益。不過要留意風險。因為戶外非常空曠,警方嘅武力可以有極大發揮空間,可以做到無顧忌清場,動用催淚彈,各種子彈,水炮車等。不過又唔需要太擔心,可以選擇用不合作形式堵塞機場,例如揸車入機場迷路,發生小型車禍,天氣咁熱行行下中暑訓左係路中都唔出奇,總之各施各法。

而呢類活動又唔需要咁擔心警方安排臥底搞事。因為各自爬山,而且採取不合作形式又無辦法用暴力清場。如果兄弟夠,仲可以做到24小時不停塞爆。

點解要搞機場?因為香港空運真係好重要,平均每日貨運量,1.4 萬噸,牽涉過千億生意。只有當商界受到影響,切到肉,佢地先會向政府施壓,而且商界好清楚我地爭取緊嘅野,都係佢地想要嘅野。而商界都好清楚係政府搞到咁,譴責示威者係無意思,再者長痛不如短痛,長遠計,癱瘓空運一段時間,所承受嘅損失唔會大過香港變成人治社會。

事實證明,政府真係好驚機場癱瘓,留意政府近日行動就可以。機管局不顧儀態,係無準則及基礎下進行出入管制,除左工作人員同有登機證外嘅人都唔畀入客運大樓,唔理破壞香港機場美譽都要阻止癱瘓機場就可以知道,政府係非常重視機場運作。

堵路方面,相信香港示威者駕輕就熟,而且唔會再畀中共有口實將示威者升級做恐怖份子,只需要堵路,唔需要破壞,呢個行動就已經可以成功。

另外提提大家如果想撐因航,又可以留條生路俾佢。 (因為中國要打壓佢,話晒敵人嘅敵人就係朋友,雖然佢咁快跪低左,但話晒都係太古集團,唔好唔記得,最撐大家嘅商場係金鍾太古廣場,大家請體諒佢業務大,受到中共全力打壓,所受嘅壓力真係好大。) 

暫時係咁多,歡迎各位補充令行動更完善。

我地今次真係唔可以輸呀,再輸就無架啦!

好希望大家知道 8.12, 8.13 呢兩日真係打咁耐以黎,贏得最靚嘅兩日,比起街頭抗爭安全得多,人員折損最少,對政府施壓亦最大效果。希望大家真係唔好因為兩個內地人就互相指責,發悔氣放棄一直堅持落黎嘅成果。我地離终點唔遠架啦,一齊行埋落去,迎接我地光輝嘅勝利!

 

發表意見