立場新聞 Stand News

【直播李飛】點解獅子會中學今次捉蟲?

2017/11/17 — 12:10

2017年11月16日,基本法委員會主任李飛出席《基本法》研討會,數十間中學安排學生收看李飛演講直播,有中學生在直播期間狀甚疲憊。

2017年11月16日,基本法委員會主任李飛出席《基本法》研討會,數十間中學安排學生收看李飛演講直播,有中學生在直播期間狀甚疲憊。

教育局叫學校兩堂唔教書要學生睇李飛直播,學校「自願」參與。咁咩學校會「自願」參加?就係教育局旗下啲官中,剩番嘅就係啲俾面嘅津中。

各大傳媒都想搵出究竟係邊50間中學做啲咁擦鞋嘅嘢,官校冇得走雞,所以冇播或者冇足本直播嘅都會回覆記者,例如no.1女官中庇理羅士女子中學就講明唔播;皇仁就話冇播李飛,只係播其他部分。肯定有跟機播李飛嘅有荃灣官中、上水官中、元朗官中、天水圍官中。

至於津校,除咗今期最出位嘅獅子會中學,完全冇人敢認參加咗。咁偉大光明正確嘅事,點解有膽做冇膽認?

廣告

講番呢間獅子會中學,係葵涌中下游學校。全香港啲有份嘅津校都唔敢覆記者,係得佢地咁高姿態衝出嚟認。今次佢地個校長好勇,唔只認要學生睇直播,仲要高調咁不停接受採訪。話呢個係「專業決定」,叫大家唔好政治標籤佢學校。

校長一面話呢個係專業決定,但就叫晒啲記者去影佢啲學生睇直播。大佬呀,你咁樣招呼記者嚟影,會影響學生「學習」㗎。你話係專業決定,你又搵記嚟影響學生,邊度專業呀?

廣告

好喇,你叫記者嚟影,咁記者咪會影到學生瞓覺囉,平時冇記者在場,你地啲老師可以捉個學生出去省,但有記者喺度你就唔做得咁,於是就影到大量響應林鄭建議「瞇埋眼」嘅學生。啲學生瞓覺相全港家長都睇到,呢間獅子會今次真係捉蟲。

影直播捉蟲仲未夠,你叫記者影學生睇直播仲唔夠,仲要好似開記招咁安排你挑選嘅學生講埋啲樣板讚美說話,俾《文匯報》大版咁報導。得罪講句,你搞到間學校形象仲左過啲左校,而家小六家長揀緊中學,你咁樣搞到間學校核突晒,啲家長怕咗你,收生人數再跌嘅話,我真係恭喜你呀。

咁核突嘅嘢,已經冇津校敢認參加,你獅子會中學又唔係啲唔憂冇人報嘅名校,仲要衝出嚟搞咁大壇嘢變身另類名校嚇走家長。如果咁唔叫捉蟲,唔知叫咩好了。

 


林勉一
2017.11.17

作者 facebook

發表意見