立場新聞 Stand News

真係估你唔到

2015/12/31 — 14:33

《食神》截圖

《食神》截圖

周星馳話齋:「咁容易俾你估到,我就唔係食神啦!」𠵱家香港變得越來越難以捉摸。回顧一年,好多人和事都係認真估你唔到。

局長缺席公聽會而用「露底式」詞彙分享遊日本「好正、好靚、真係好正」,一個月讀三十本書而卻如此語言貧乏兼無味,失禮!尋日買定花生擔埋櫈仔一心諗住睇好戲,結果連上海仔咁有江湖地位都會臨陣「被消失」,失威!樹仁大學學生涉嫌立法會縱火焚燒垃圾桶而被捕,失手!港鐵古箏公關災難,失策!鍾樹根選區議會意外落敗於新丁對手「傘兵」徐子見,慘遭「連根拔」,失準!劉浩龍食咗3啖麵不敵污糟手嘅FB post,失言。盧寵茂於港大插水跌倒,失足!

廣告

估你唔到嘅高手,並唔會好似以上那些冇舖排、唔覺意、失手兼撻Q。我哋做廣告好多時都要靠一啲估你唔到嘅人物關係同情節而達到出人意表及出奇制勝之效。當中以日本的細膩精煉及泰國的搞笑絶核創作尤其利害。各位同學、局長、公關、大俠、藝人,不如真係認真啲做下功課,研究下點樣舖排、點樣寫script、點樣交戲、點樣先搞到氣氛、引人入勝啦。所有好的廣告,都絕唔係三朝兩日就如神來之筆咁一揮而就。背後做咗幾多準備功夫,並唔係次次諗住打天才波、是是但但咁就過到骨。我見過最好嘅presenter、演講家,都會不約而同地在演出之前做rehearsal 。專業犯案定必有晒部署,睇戲都知啦,就咁帶個口罩就放佢一個火,唯一解釋就係情緒失控及搏差人拉。高明的司儀要精心寫稿同背稿,手上拿著一疊卡紙立於人前並不夠pro。有經驗的公關做足危機處理,無論邊個角度,都擋得住、耍得走,漂亮流麗,試問又點會越描越黑?不如收聲好過!

希望出年大家可以努力啲,做啲「堅」估你唔到嘅事,而唔好再搞啲估你唔到咁「流」嘅嘢啦,真係失禮香港㗎。又借星爺作結:「精神啲!臨時演員都係演員嚟!」

廣告

發表意見