立場新聞 Stand News

真國教:二十年

2018/3/22 — 6:43

【文:鹹錦鯉(全文教育局 HKEd4All 特約文章)】

前言:中國政府在大數據和AI領域傾舉國之力投入資源,目前已經初步建成舉世無雙的天網監測系統。個人在大陸產通訊軟件的發言會被實時監測、走在路上會被攝像頭面容辨識、甚至智能汽車在群體事件發生時會被廠房雲端鎖定。國家的權力不斷進擊,人民的自由日益萎縮。無險可守的香港,在20年後又會如何?

而家係2038年,Jayden 年近四十,無結婚無仔女,打份政府工都叫比上不足比下有餘。論資排輩,今年升職輪都輪到自己,點知隔籬位阿Sam屋企有關係,一個唔該就爬左自己頭。

廣告

“有咩辦法啫,鬼叫自己公屋仔無人無物咩。” Jayden一個人落bar隊左幾杯威士忌,大聲鬧左幾句後call左架的士返屋企一覺訓天光。

第日朝早,Jayden個頭勁赤,望住電話新收到嘅SMS: “香港市警察嚴正警告...” ,爆左句粗之後:“又黎詐騙短信?今個禮拜第幾次呀......”,就刪左條SMS。

廣告

跟住,Jayden發覺自己已經唔再喺WeChat 同學Group ,搵左幾個Admin,無人應佢。Jayden左諗右諗,點都記唔起自己邊度得罪過啲同學。

算,返工先,Jayden 落去停車場攞車。

新買嘅比亞迪陸地戰車無反應,中央熒幕閃爍住血紅色嘅大字:“根據有關政策和規定,用戶李梓軒駕駛資格已被吊銷...”

Jayden 心知不妙,即刻打去比亞迪客戶服務問發生咩事,但係收到嘅回應係:

“抱歉先生,我們也查不到具體事宜。”

“對,不是誤操作。”

“先生您幹了什麼可能您心裡會比較有分寸。”

“如果您想起訴那麼我們也沒有辦法。”

Jayden仲係唔知發生咩事,但都要返工架。無奈之下,佢行去屋企隔離嘅共享單車泊位搵左架黃色嘅單車,諗住用支付寶共享服務解鎖…

“失信用戶需先支付押金共3000元才可開始騎行。”

“下?!唔係嘛?”

Jayden開始覺得大事不妙。

“失信用戶?失咩信?個個月8萬按揭全部按時還曬架,邊可能失信?”

佢開始恐慌,一定有野搞錯左,肯定。

搭左地鐵返工先,有咩留返放工諗。康城地鐵站排隊等候安檢嘅人龍,居然令Jayden覺得有啲安心。

當Jayden靈光一閃,終於諗起自己尋晚係酒吧講過咩野之後,佢望到人龍旁邊幾米高嘅“犯罪份子曝光熒幕”,佢個樣同罪名清晰無比。
“李梓軒:侮辱國家主席罪,在逃。”

Jayden瞬間唔識反應。

安檢員透過特製眼鏡掃視人群,視線喺Jayden度停低左。

“李梓軒?”

“......我係。”

“過來這邊。”

“我... 我還要上班...”

“廢話什麼,你過來等著,一會兒警察來和你說話。”

“唔係呀唔係呀,我點解,我.......”

“少廢話你擋著後邊的了,過來!”

無幾耐,一個圓臉小警察同埋一個長方面口嘅老警察慢慢行左過黎。

“你嬲呀?” 老警察問

“沒有沒有。” Jayden連連否認

“沒生氣你亂說什麼?沒生氣你就敢大放厥詞了?你以為你一個人在酒吧說話就沒人知道?你以為你喝完幾杯酒就能違法亂紀了?” 小警察連珠炮發。

“我真沒... 哎呀求下你呀阿Sir,我仲有屋企人架。”

“收聲!行啦!尋晚係威係勢,而家成隻鵪鶉咁,行啦!” 老警察不屑一顧。

三個月後。

Jayden同政府同事關係其實都唔錯,不過無左佢,日子一樣咁過。

“Jayden佢而家點呢...”

“哇,乜仲未del佢?芝麻信用扣三十分架,按揭利息你想比多幾千呀?”

“係係係,即del!”

Jayden 而家喺邊?做緊咩?無人知,亦都無人想知。大灣區創文明三擁模範城市市民唔需要知咁多無謂野。

歡迎來到未來。

(完)

 

發表意見