立場新聞 Stand News

示威攪到生意變差?其實腦殘先至係主因

2019/11/9 — 15:21

立場新聞圖片

立場新聞圖片

陳茂波成日話香港因示威攪到生意變差,其實生意變差,腦殘先至係主因。

如果少左一堆自由行黎,藥房金鋪就話頂唔順要執,咁都要檢討下係咪開得太多,係咪坐食山崩太耐,已經連做生意最基本要靈活變通既能力都冇埋,預左一直會有人射條水包你必賺?

如果咁多年黎,你都睇唔到香港法治逐步崩壞既政治市,重以為好好市冇預計過唔同風險出現,咁亦都真係與人無尤。

廣告

唔係點解近年咁多公司都請人 in-house 做 political risk analysis,就係知道今日做生意要睇社會動態環境,就算攤大手板就有錢跌落黎,都要知有咩風險係會從手指罅跌走。

醒下啦,世上真係冇呢種利潤保證既生意,就算係有政權撐腰既生意,特權都難保有一日被人拉番落地。過去香港旅遊業過度依賴大陸自由行,叻既咪識變通轉番多啲做本地客,腦殘既咪公開講放棄年青人繼續等俾人裝修,死痴著政權睇下分到幾多俾你。

廣告

我一直最睇唔起係個堆工程利益,成個行頭一半都靠政府拎啲地稅做基建工程圈養,當市民要審議啲冇用千億大白象工程個陣,就走出黎話人阻著佢開工,而唔係行出黎諗下啲大家真正有需要既工程黎做。大哥,億億聲公帑一定係要黎俾你做飼料架?

當然黑警晚晚周街 TG 放題,又唔見人又打死人,大家個心情唔好,梗係會影響日常消費,買件新衫、眼鏡去旅行都冇精神。

親身經驗,自己在旺角開辦既民間課程報名都收少左 3 成,事實上今日都唔知聽日事,大家都好難 commit 稍為長少少既活動;成場運動令好多朋友人生轉軌道,研究社都收到唔少通知話停工冇收入再月捐支持民間研究,唔駛你陳茂波講我地都知有影響,諗著喺香港經營,就係要預左大家一齊要承擔改變呢個城市個陣既成本同代價。

但我真係唔覺得,大部分香港人呢幾個月積蓄多左駛錢駛少左。至少我身邊識既朋友,好多都幾乎 all-in 收入,有啲重捐薪家咁狂買野、支援前線、出交通、參與眾籌去支援有意義既計劃。另外一部分,就幫襯移民公司俾錢升學學定外文,啲錢只係駛左去你未必計既地方。跟著就有班人,話你捐薪家個班係影響佢地生意,阻著佢地「收成期」。

所以其實根本冇所謂收成期,只係有班剩係識坐食山崩,自己睇唔通個問題,重要話人地影響佢,已經喪失做生意能力既腦殘。

作者 Facebook

標題為編輯所擬。

發表意見