立場新聞 Stand News

禁止電子煙,係今年最離地嘅政治主張

2018/10/12 — 16:51

資料圖片

資料圖片

【文:山鬼】

尋日睇到施政報告,除左見到政府拎全港所有人嘅人工去填海起個人工島,呢個名好啊,名符其實拎大家嘅人工去賭。後來睇公民黨話今次個報告有半啖砂糖,原來係公民黨終於成功爭取全禁電子煙。泛民終於都爭取到政府支持,都算係可喜可賀。

但得罪講句,呢個主張真係離地到痴線,係離譜。可能公民黨啲票源好鍾意,但對於呢個社會嘅基層來講,真係唔能夠接受,全面禁電子煙係痴線。

廣告

支持全禁班人知唔知有幾多人由傳統煙轉食電子煙? 有幾多人係靠加熱煙去戒煙,又或者減低對身邊嘅人嘅影響?

大佬啊。食得煙嘅朋友唔通係為咗追求健康去食咩,雖然電子煙真係健康啲, 但冇人會幻想食完之後會即刻變到好健康,個肺變到好似瑞士山區肺咁脫俗清新。每個人都係度進步緊,有啲人繼續食希望對其他人影響小啲,有啲人可以藉呢個機會戒煙。而家突然就話要全面禁止,咁即係點呀?

廣告

政府就好似同全香港嘅煙民講,你一係就繼續害人,一係就即刻戒咗佢。喂阿哥,如果戒煙真係咁容易,香港就唔使有一大堆戒煙中心同熱線。

就算打算繼續食,都有權選擇對自己更好同更低傷害嘅產品,呢啲都算係基本人權…

同好多香港人一樣,我一見到政府話要全禁都嬲到痴線。成個 facebook 都係度粗口問候。試問一個常人又點能夠理解政府嘅高深想法。唔好講話咩健康嘅理由,傳統煙仲有咩缺點? 

係臭啊!好 L 臭啊!陣味又唔散!

之前篇文都有講過同老細食完餐飯,成身都係煙味,下午兩點都未到,仲要臭足一日。嗰啲老豆老母食煙嘅細路仲慘,一返學就俾老師捉佢照肺。而家老細得返幾飛煙彈喺手, 佢食完之後我又要繼續捱臭味,真係多謝晒。

公民黨今次嘅成功爭取,真係 over 咗一大班二手煙受害者嘅 dead body, 計我話應該開個記者會講返句:「 捱過二手煙先有更精彩嘅人生!」 

其他喺議會入面嘅民主派,希望你哋可以急弱勢之所急。傳統煙真係好難頂。

發表意見