立場新聞 Stand News

究竟誰在「辱華」?

2016/10/24 — 0:01

TVB新聞截圖

TVB新聞截圖

今年2016年底了吧?我有冇搞錯?

所謂堂堂的13億人大國、全球人口最多的國家、全世界最大的單一民族 — 華人、世界第二大經濟體。

都什麼世代了?二戰結束後已經70年了、中共建國也67年了。

廣告

現在兩個後生仔,兩個人嘅年歲加埋都未有資格參加小圈子遊戲競選做特區行政長官,仲要係自己管治下嘅地區嘅國民,講咗「支那」兩個字,就叫做「辱華」?

根據共產黨嘅定義,佢哋「首先係個中國人喎」!係隨時可以喺全球各地被強力部門搭返大陸個種人喎!

廣告

以前話:「漢人學得胡兒語,卻上城頭駡漢人」,用嘅語言起碼都叫做外語呀!佢哋依家用緊嘅係佢哋嘅母語中文喎!仲要記住,佢兩個人都曾經分別被國家嘅意識形態機器染紅過嘅噃!

話俾人聽有兩個「華裔」嘅𡃁仔𡃁妺用「華語」嚟「辱華」,因而激親十三億國民及全球「華人」,呢個講法係咪似乎好古怪?不如話佢哋「無家教」重好啦!

搞到咁大陣仗、公告天下、向全世界宣布呢件咁戇居嘅事,睇嚟重「有辱國體」,向全世界展示自己點樣自取其辱,亦可以話係唔怕肉酸,向全世界宣佈自己搞到個場幾核突。想問清楚,依家其實邊個喺度「辱華」?

呢班咁嘅嘍囉,連問題嘅基本性質都未搞清楚,將自己嘅一派小家子心態及民族自卑感盡情咁暴露於人前,仲要驚死人唔知自己啲家醜。仲唔係有組織地侮辱自己國家?

呢班咁嘅嘍囉,以為執住兩個𡃁仔嘅痛腳,就可以盡情向阿爺表忠示勇,實質上就係自挖瘡疤,將整個國家帶返去19世紀義和團年代。如果這件事算得上是有任何「辱華」成份的話,最應該被譴責「辱華」嘅其實係佢哋自己!

原刊於作者facebook

發表意見