立場新聞 Stand News

立法會嘔血狂想曲

2016/9/3 — 22:28

2016年9月4日為立法會投票日(資料圖片)

2016年9月4日為立法會投票日(資料圖片)

I had a dream。喺尋晚。Weird & bad dream。夢境瀝瀝在目,因為實在太顛太震撼。

可能近日睇太多競選論壇,夢中嘅第一場景,係一個「全明星」陣容嘅新一屆立法會會議。

陳玉娥議員與蔣麗芸議員坐在附近,先後發表對思歪嘅「愛的宣言」,呼籲港人義無反顧支持特首施政。元秋兩頰泛紅瞇著雙眼先講:「好多男人連結婚紀念日都記唔清楚,何況係一國兩制高度自治嘅承諾呢?」插住Hello Kitty髮夾嘅娥姐後上,演說時俾大家再次回味佢喺競選期間論壇時嘅名句:「思歪,就係太完美。」

廣告

身為娥姐同鄉兼立法會主席的詹培忠聽到依句,突然拍枱爆Seed:「妳地離L曬題!真係十個女人十個係⋯⋯」

正當金勞詹想講最後一個字之際,兩隻玻璃杯同時飛向主席台,擦起潮州怒漢頭上第19條車軌,飛花擲葉者,正係雙雙站喺枱上抗議指罵嘅新一代立會「穿屎」 - 李偲嫣與林依麗。

廣告

主席馬上勒令將阿嫣同阿麗抬出會議廳。偲嫣BB 向箍住自己嘅地中海四眼中年大叔怒吼:「你知唔知乜嘢叫做正義嫁?我不嬲撐警嫁,你唔識投桃報李嘅咩,竟然拉我出去!?你個X街!」大叔將有點乾烈嘅小嘴慢慢靠向BB嘅耳窩,細細聲講:「Sor9ly,我諗妳認錯咗人。我唔係警察,我係一名保安。」

喺林依麗嘅女高音環迴怨婦獅子吼於議事堂終於 Surround 完嘅嗰個Moment,侯志強舉手要求發言:「主席,冇乜嘢!我只係想起身表揚你趕咗嗰兩條八婆出去。無乜嘢我坐番低先,多謝主席。」坐喺旁邊嘅何君堯拍拍侯強膞頭,嘴角微微上揚,直豎拇指以作肯定。

擾攘一輪過後進入第二個議程,高達斌議員就政府提出嘅重啟「一簽多行」措施發言:「水貨貿易有利中港融合,我老婆最贊成。」高達斌講足15分鐘講得相當興奮,口水彈到前面謝偉俊後頸,謝轉頭怒睥,超人與高達之戰一觸即發。旁邊嘅梁美芬撲出嚟做和事姥姥:「好心啦你地倆個,用和平理性方式解決矛盾,唔好用暴力呀。」

跟住發言嘅容海恩議員,向到場解釋政策嘅官員提問:「咁包唔包飛嗰啲呢?」換咗中間分界新髮型嘅狄志遠响後面拍一拍「立法會馬海倫但佢以為自己係桂綸鎂(簡稱立鎂)」:「立鎂,冇人用飛機走水貨嫁。」側邊嘅葉劉聽到依句新思維,嘴藐藐笑出嚟:「你識條鐵咩,空姐走嗰啲LV、Gucci,咪係用飛機嗰囉。」玩緊iPhone嘅田北辰都搭嘴:「Versace都有水貨嫁,呢個牌子啲西裝都Ok,不過我最近比較鍾意著國內嘅柒牌西裝,貪佢性價比高。搭每公里$0.97嘅東鐵番深圳轉高鐵上大陸買,仲化算呀,妳知計依啲火車鐵路價錢,我熟到爆嫁啦。」

重啟「一簽多行」政策經過一輪討論後,準備付諸投票表決,但在席議員未夠法定人數。金勞詹喺枱底 Wechat李慧琼同王國興:「Pu Ni A Mo!你地兩個快L啲 Call 你地嘅黨友番入嚟啦。」

李慧琼子喺Hong Kong Club收到Wechat,施施然Message 葛珮帆、陳克勤、柯創盛、梁志祥、陳恒鑌、張國鈞、周浩鼎:「喂,你地幾個求Q其搵人入去襟掣啦,金勞燥哂底呀。過唔到阿爺吊起你地嚟打啊!」

另一邊廂嘅王國興坐緊地鐵,個手機放咗喺背囊,Miss 咗個Message,通知唔到喺皇雀會打緊牌嘅四位議員鄧家彪、黃國健、麥美娟、郭偉強。

投票前嘅關鍵一刻,民建聯終於班夠人番會議廳,議案付諸表決。點票結果,贊成62票、棄權0票,反對2票。

翌日,謝偉俊喺 Four Season 同白姐姐食早餐,攤開份成報,頭版刊出建制 Whatsapp Group 嘅截圖,當中有人問:「一早講好個個投贊成票,究竟邊Q個襟咗反對呀?」葉劉第一個覆:「唔好意思,我教極容海恩,佢都搞亂贊成同反對兩個掣,我會叫佢溫熟啲功課嫁喇,包容吓佢啦各位,我諗襟多半年左右佢會記得嫁喇。」第二個覆嘅係高達斌:「Sorry!」

睇到依段Whatsapp 對話流出新聞,超人陰陰嘴笑,對白姐姐講:「人蠢,真係冇藥醫。」

夢到白姐姐開口回應嗰刻,我紮醒咗。

依個立法會直選陣容,絕對堪稱夢幻組合。如果真係咁排陣,TVB、ViuTV、有線、Now相信個個爭做立法會會議直播,因為無論任何編劇,都寫唔出媲美依個立會陣容發言所能產生嘅荒誕同幽默。

依個Dream Team 只係一個 Dream?

守唔住直選過半數議席,失去對惡法制衡否決權嘅立法會,其大鑊程度,同 Dream Team 嘅出現或許相差不遠。

各位珍重香港民主、自由、人權嘅朋友,記住聽日呼朋喚友出嚟投票,票投非建制派。

9月4日,香港需要你嘅一票。

作者facebook專頁

發表意見