立場新聞 Stand News

笑吓啦香港人

2019/7/25 — 7:08

林鄭月娥與官員離開

林鄭月娥與官員離開

前日,你睇新聞直播或錄播時,聽到利君雅以問題當作武器,講人話呀唔該,句句夭心夭肺,直踩林鄭及一眾「高官」脆弱心靈,灰頭土臉,仿如喪家之dog dog,其後同場加演黃毓民杜汶澤喪插林鄭,係咪覺得好心凉好治癒呢?如果你仲識笑,畀個讚你。

721元朗恐襲之後,朋友問我:「文明崩潰,可以如何?」我當時咁答佢:「如果真係文明崩潰(我認為未到此一地步),第一,要盡力保持心理健康,識得幽默,苦中作樂;第二,倘有餘力,幫助他人。做人嘅嘢,人人總有一死,最緊要係不枉此生。」

面對心高氣傲嘅林鄭及四個口嘅「高官」,佢哋嘅死穴就係骨子?睇唔起人,見佢哋畀人奚落嘲笑責難謾罵,畀人用粗口親切問候,一面錯諤,一面無辜,手足無措嘅死樣,大大打擊佢哋自信心,呢個攻心為上嘅方法,就知道一定正確過正確。

廣告

須知,路漫漫兮,鬥長命,鬥意志,鬥毅力,鬥謀略,鬥笑得大聲,開懷大笑嗰隻,至係保持戰鬥力嘅不二法門。

後記:
啱啱睇到柳俊江最新post,勉勵大家,全民健身,#笑吓啦香港人,送畀柳爺。

廣告

後後記:
一經發現好笑嘅文章或video,請廣傳,獨樂樂,不如眾樂樂,好人一生平安。要笑到班焗腸信心盡失,笑到佢哋面黃,笑到佢哋抬起頭,唔敢面對群眾,畀佢哋屋企人勸退。

原刊於作者 facebook

發表意見