立場新聞 Stand News

等埋發叔先!

2015/6/22 — 2:16

上週四,政改方案在立法會被否決。議會表決鐘響至最後一分鐘,有議員求休會15分鐘,但由於立法會主席曾鈺成已宣布表決,不能暫停會議。導致出現 8人贊成、28人反對議案的否決結果。 (立法會直播截圖)

上週四,政改方案在立法會被否決。議會表決鐘響至最後一分鐘,有議員求休會15分鐘,但由於立法會主席曾鈺成已宣布表決,不能暫停會議。導致出現 8人贊成、28人反對議案的否決結果。 (立法會直播截圖)

【文:乾隆與小燕子@進步會師】

「等埋發叔」呢句,可能會成為以後遲到或者缺席者嘅金句。返工遲到搞到個無左單生意,俾老闆鬧記得答「我要等埋發叔」;去踢波遲到搞到隊波唔夠人無左3分,俾隊友鬧記得答「我要等埋發叔」。再唔係,補多一句「我跟大隊」就可以推得一乾二淨。以上嘅例子,「發叔」到底係邊個唔重要,係黃宏發、劉皇發抑或余宜發都無所謂,因為個重點係可以俾自己一個下台階,甚至可以迫人食咗隻死貓。

聽落好無稽?但以上正正係我哋尊貴嘅立法會議員對自己係政改方案「8比28」鬧劇嘅解釋。但係更無稽嘅係,當呢班棄票唔投 (sorry 其實都算有投嘅...如果按照我地前會計界功能組別議員、現任發展局局長陳茂波咁數場外外圍票嘅話...) 嘅議員向記者解釋後,唔係立刻準備記者會向公眾交代講聲對唔住,而係擔心阿爺會嬲嬲豬所以要去西環向中聯辦解釋。

廣告

作為一個香港市民,除咗恥笑佢哋犯下嘅低級錯誤,我都忍唔住爆左幾聲粗,不滿佢哋呢個「等埋發叔」嘅解釋,更不滿佢哋公開向傳媒指出要向中聯辦負責。呢種行為完美演譯「西環治港」,立法會一部分議員奴才化,立法會已經淪為「橡皮圖章」。呢班「保皇」議員入面,有好多都已經從政多年,無理由唔清楚自己議員嘅身分及責任。唔理你係地區直選抑或功能組別議員,首要嘅係向你嘅選民負責,包括代表選民發聲、提出議案、表決議案。係呢個咁重要嘅議案表決程序,棄票不投「場內票」已經有錯,最錯嘅係其中有人只顧向阿爺交代,並無想過如何向公眾及選民交代。

誠如田少所指 (下圖),可能今次主要係人蠢無藥醫。人蠢,唔緊要,有人肯幫手你又肯聽咪得囉。其實社會上有好多年青人,有能力一齊肩負起向社會交代嘅責任,更重要係可以填補呢班「蠢」人欠缺嘅智慧,雨傘革命期間多位學生嘅表現絕對可見一斑。但香港一班政界嘅人從來無諗過要放手或者聽取年輕人嘅意見,例如已逾七旬,前律政司司長、基本法委員會副主任梁愛詩喺雨傘革命期間指「點放心20年後將香港交畀年輕人管?」筆者當時聽到時都不禁又爆左聲粗,心喑「到時唔通仲靠你?」

廣告

相比之下,保守的國家如日本,最近倡議修改憲法,把參議院選舉選民年齡由二十歲降至十八歲,與其他歐美先進國家睇齊。呢個建議係自1945年以來首次提出,選民人數將增加約240萬人,佔總選民人數約2%。以往的衆議院總投票率逐年下降,由70年代的約七成降至近年的五成,(不過五成都有五千四百萬人,唔算少㗎),尤以二十至三十歳組別最低,只有三成幾。有見及始,有政黨提出呢個建議,希望吸納更多年輕人的意見,提高年輕一代的投票率,選舉認受性及代表性,真正的向民主發展行前一步。

因應呢個重要國家政策,政黨紛紛出招,落區去學校訪問,甚至喺全國各地成立「學生擔當役員」廣泛吸納年輕人意見,唔係香港果啲「青年委員會」,由含住金鑰匙出世,不知民間疾苦的富二代擔任。

日本有學校舉辦模擬選舉給高中學生,講解投票程序,進行小組討論,教他們怎樣睇候選人政綱,引領學生們思考日本的重要課題,倒如地震災後重建,經濟改革,教育,醫療,老人福利等等,然後因應自己各自心水候選人進行模擬投票。筆者非常欣賞呢種公民教育的好例子,不僅能夠提高年輕人的政治意識,培育政治人材的好機會,最重要係,政黨一定要聽取後生仔意見,加入為政綱,而唔係好似香港政治環境下,政府把年輕人的意見拼棄門外而無需負任何政治後果。
今次成功否決政改,唔多唔少有啲運仔,正如方展博話齋,要嬴一個好運嘅人,就係要好運過佢。今次對家唔小心小相公,泛民好險食得出鋪牌,或者車公顯靈啦,但之後政府一定會捲土從來,整出另一個「袋住先」方案,大家千祈唔好中計。

否決政改後可以做咩?登記做選民囉,記住今年七月二日前double check 自己係咪喺選民登記冊上,尤其是搬過屋的,如果唔係你就收唔到選舉通知書。(網址)  建制派最叻係咩?(老)人海戰術,蛇齋餅糉,但佢地怕咩?怕高投票率,仲要係高學歷專業人士同中產!所以我地一定要企出嚟,要佢地「票債票償」,親手將建制派垃圾議員趕出立法會!「刻不容緩」呀各位,唔洗等發叔㗎!

 

 

 

邊有咁多陰謀論啊,主要係人蠢無藥醫

Posted by 田北俊 (James Tien) on Thursday, 18 June 2015

發表意見