立場新聞 Stand News

「紅酒 × IT」咪好似「中國 × 香港」咁,勉強冇幸福囉

2015/4/13 — 21:47

【 文:[email protected]前線科技人員議政小組 】

呢幾日特區政府、香港紅酒協會同香港軟件行業協會,帶頭喺中環海濱舉行「香港數碼生活嘉年華」同「添馬紅酒佳餚節」,大玩紅酒配數碼產品 wine-pairing 嘅綽頭。之但係,根據傳媒報導同朋友親身經歷,由於春雨綿綿,主辦單位又冇及時喺地面鋪木板,結果搞到周圍水浸,滿街爛泥,中環海濱變濕地公園,人人寸步難行。再加上宣傳唔夠,導至無乜人去,商戶當然血本無歸。有畀咗六萬幾參展費嘅紅酒商話:「朝早基本上無人,晏晝亦只有小貓幾隻!」「全日賣咗七支紅酒,生意額得嗰五百幾。」你話可唔可悲?

廣告

查實「電腦特賣場」點解要同「紅酒節」搞埋一齊,兩者之間有咩協同效應?我百思都不得其解,自問真係睇唔透。「電腦特賣場」嘅客仔主要係後生或者想買平貨嘅人,可能賣豬皮魚蛋會增加到吸引力。但同一班人,對紅酒佳餚應該冇乜大興趣掛?

展場情況咁惡劣,參展商當然投訴主辦單位管理不善。但係主辦單位竟然反駁:「天氣欠佳,令入場人數較預期中少,問題唔係管理不善」,「宣傳係咪足夠屬於見仁見智」和「做生意要靠自己」。其實呢,以往「電腦特賣場」一般都喺室內舉行,因為正常人都唔會準備喺滂沱大雨之下試玩平版電腦同相機。但係為左遷就「紅酒節」嘅客人鐘意對住月光嘆紅酒既欲望,而被迫喺雨季將「電腦特賣場」移師室外,主辦單位就應該預左會落雨,諗定點樣應變啦!香港四月係雨季,就連五歲既小朋友都應該知道。想以天氣問題四個字將責任推得一乾二淨?主辦單位都係真幾無賴。

廣告

睇遠少少,勉強將「電腦特賣場」同「紅酒節」放埋一齊所造成嘅困局,同依家嘅中港矛盾又真係似到十足!香港咁多年嚟信奉現代文明,社會講嘅係法律條文所定立既權利義務;但中國自共產黨掌權以嚟,信奉嘅係專權人治,經常迴避法律。對於《基本法》入面寫既「普選」,香港人由始至終都相信喺符合聯合國國際人權公約嘅標準果種。點知中共先嚟一招「愛國愛港,理所當然」,再嚟一招「過半提名,最多二至三人出閘」,不斷僭建《基本法》,藉此踐踏法治。如此手法既粗暴又野蠻,真係令香港人目瞪口呆。

講到尾,既然兩地嘅文明水平咁唔同,信奉嘅價值觀又有天淵之別,與其勉強放埋一齊互相猜忌,互相拖累,係唔係有更好嘅方法去處理呢?根據以往既經驗,「電腦特賣場」喺灣仔會展開,「紅酒節」喺中環海濱搞,先至係令參展商丁財兩旺賺大錢嘅好方法啊!

 

 

相關報導:

中環海濱嘉年華人流少 商戶獲退三成租金

大家剷泥齊抽水,中環電腦節成「水地獄」

添馬紅酒佳餚節慘變小食亭!酒商:「今日連一張試酒券都收唔到!」

中環IT紅酒展 雨後爛地趕客

前線科技人員所拍得的現場照片

前線科技人員 facebook page

 

發表意見