立場新聞 Stand News

組班第一步就是反左

2017/4/10 — 7:23

候任特首林鄭月娥在一眾保安人員簇擁下,到訪觀塘裕民坊。

候任特首林鄭月娥在一眾保安人員簇擁下,到訪觀塘裕民坊。

林鄭上京面聖接委任狀,然後同王光亞開工作會議,應該是討論組班情況,究竟共產黨會畀幾多空間佢,關乎未來五年特區政局。坦白講,梁振英令香港政府面對殘局,要從頭收拾舊山河,並不困難,問題在於689及其後台是否仍然主導香港政局。我一直認為特區唔「反左」,大幅糾正過去五年執行的極左路線,邊個上去做特首都係嘥氣兼嘥時間。2005年老董落台,北京為顧全面子,董系人馬原班留任直至曾蔭權07年重新選舉。共產黨算盤是唔想畀香港人認為中央跪低,保住中央權威。但今時今日,呢種做法冇用,而且會有嚴重後果。

義和團式建制助長反對派

林鄭在競選中民望暴跌,係因為香港人本來對佢有期望,希望擺脫689極端手法及鬥爭為綱,但林鄭明顯唔想切割,對西環在選舉中扮演幕後操盤者角色也含糊其詞,所以才惹起民眾反感。由於民望低迷,佢手頭上可以打的牌有限。即使在北京監督下無法公開反左,下屆政府亦要暗中進行。第一步是全面清除梁系左王,經常在台前煽風點火之徒,林鄭同呢棚人無任何政治關係,最重要公眾會以此作為評估標準,究竟2.0之說是否可信,抑或好似公民黨楊岳橋所言,林鄭重視民望,因此另有打算。正所謂一粒老鼠屎搞臭一窩粥,只要是但一個阿茂出現在新班子,包括留低一件陳茂波,或加入一件盧寵茂,就必死無疑。

廣告

第二唔好再用一班「滑晒牙」、政治形象欠佳的所謂建制人士,包括黃成智、狄志遠、湯家驊、陳振彬之流,又係必死,因為佢哋在公眾眼中,係一棚無立場的偽溫和派。左又唔用得、搵食格又唔用得、北京又唔會放泛民,咁仲有乜人可用,唔通真係要用到張宇人?

我認為出路只有一條:「專業」政府,即係用番2007年曾蔭權方式,搵兩三個由政務官轉型做局長,聶德權也好、乜水也好,冇人識唔緊要,總之就多談政策,少談政治。689政府有一樣極之低能的做法,就係「衝出嚟」挑機,宣揚自己一套歪理,以討好內地官員,證明自己據理力爭,捍衞北京立場。呢種義和團式愛國賊行為,只有一個效果,就係助長反對派聲勢。每星期大家等待馮煒光的文章,然後轉載,在媒體轉發後一人一句,變成笑片。無論其他問責官員如何努力,都抵不上一個白宮發言人帶來的破壞。

廣告

特區政府過去五年全無規矩章法,官員用網誌公佈政策有之,官員全時間剪綵、外遊有之,形象惡劣如吳克儉可以做完任期,反之曾德成、鄧國威就被DQ。林鄭應該執番正行政會議發言制度、特首辦發言人角色、中央政策組全職顧問角色,禁止再出現類似張志剛、馮煒光、陳茂波之類,從事騎劫政府政治論述的行為,以挑機為樂。佢應該記得若非張志剛大力宣傳北京「換人不換路線」,她也不會打上6892.0的烙印。

薯粉現象反映香港人厭倦了無日無之的政治鬥爭,大家真係想唞一唞。假如佢可以由6892.0過渡成為薯片叔叔2.0,咁就可以換到時間,重新上路。當然,689一系唔會咁容易畀林鄭切割。

(文章原刊蘋果日報

發表意見