立場新聞 Stand News

給和理非遊行的溫馨提示

2019/10/7 — 14:28

【文:一名讀者】

尋日我哋由天后行到去灣仔,跟住見到人開始爆中銀,開始掟燃燒彈,唔使幾分鐘,就開始TG,我地同埋啲人,一齊向山上面跑,由軒尼詩道跑到上堅尼地道,條樓梯非常攞命,尤其係冇做開運動嗰班。跟住一直行去花園道,再上麥當勞道、經羅便臣道道、蘭桂芳、一路行落去上環……由天光行到天黑…… 足足個半鐘!

跑到上堅尼地道時,條路好窄,人多逼實哂,個個好驚,開始有人嗌行唔到,佢哋根本唔識路,淨係識得落灣仔、跑馬地、銅鑼灣,但大家都知嗰邊重狗,又有防暴,冇得走…… 有班Full gear 開始嗌,唔好推,慢慢行,一個跟一個,唔好跳欄杆,你哋咁慢,爬得嚟,再跳過去,會畀車車死! 又會塞住後面, 唔好爬啦!一個跟住一個慢慢行就得啦。

廣告

Full Gear 嗌完之後,秩序好好多。其實,佢哋真係成班細路,包括埋嗰啲幾十歲嘅,都可能唔及班Full Gear嘅心理質素高。 去到有危險時,完全冇哂方向。

我哋企咗喺堅尼地道樓梯頂,叫啲人分散嚟走,有gear想繼續嘅可以落銅鑼灣方向;行得山嘅,可以向山上,山頂方向暫避,冇gear果D就除口罩跟我哋落中、上環,因為會途經特派員專署……期間,冇人問過我哋係邊個,總之我哋講乜,大家就照做。 Full Gear 嗰班就好忙咁維持秩序。食完TG先跑嗰D,咳到嘔,係真嘔、嘔完再嘔!現場笠笠乱,又冇FA,大家只可以互相照顧。

廣告

有D女仔心理質素未够,一味喊……低能到見到警車嗌,真係想打佢一鑊!反而Full Gear 好冷靜咁講,再嗌就大家一鑊熟,我都唔打得咁多個……。

有幾個 observations,和理非係時候長大啦,「遊行」唔係「郊遊」:

1.  每個遊行都要預佐TG、要跑,所以要做足夠心理準備;  
2.  要帶足够水、毛巾,記住唔係紙巾、熱茶……因為水可以冲眼,熱茶會淥死你
3.  要有衫換,除非想著住有嘔吐物嘅衫
4.  衣服鞋襪要合適,唔係裙、裙褲、平底鞋……有D未跑完條樓梯已經後踭損哂,可以想像有幾痛!
5.  唔使揾厠所換衫,開2把遮,已經可以換到衫
6.  幾個朋友一齊出去遊行,事先分配吓工作,唔使有事嗰陣先問點算……
7.  唔好靠哂班 full gear,佢哋人唔多,要帶隊,要扶D老弱,要攔路,要睇水,要聯絡、已經好忙
8.  可以嘅話,幫吓隔離嗰個,睇吓後邊仲有冇人……大家都可以走到
9.  截到的士嘅話,坐滿佢……唔識都冇所謂啦,大家都知咩事
10.  要預咗,公共交通一般都會斷曬,如果唔怕畀差佬查證,就可以搭巴士或者自己搵定朋友車。其實,最安全係留返喺個區度食下嘢、行下,消磨幾個鐘之後先至慢慢返屋企。

最後、最後……跨區掙場好好,最重要係!!!

一定要揾定逃生路線
一定要揾定逃生路線
一定要揾定逃生路線

標題為編輯所擬。

發表意見