立場新聞 Stand News

緊扣人心,官員看不懂的人鏈

2019/9/10 — 22:31

9.9 各區人鏈

9.9 各區人鏈

就算唔同意他們的訴求,但人鏈這一種表達方式,就好似連儂牆一樣,都沒有傷害到任何人,都是和平的表達方式,也沒有破壞任何嘢。但那些藍絲、親建制親政權嘅盲毛、甚至包括部份休班警員,都係要用暴力、要靠惡,要用搗毀、打人、甚至斬人等等手段作反應。令人十分厭惡兼反感。

幾個月下來,針對人、以傷人為目的嘅暴力,主要都是來自那班所謂親建制力量。好像沒有見過示威者攞刀斬人,冇見過示威者出𠝹刀,冇見過示威者主動𢲡棍以朴濕對家為目的!

點解支持建制的、支持政府的、支持中共的,總係會與黑幫、江湖勢力、暗黑勢力,甚至與中共官員口中所謂的「正義的愛國力量」(大家明係乜)撈埋一碟?到依家,就連應該維持治安、保護市民的警察,也變成了只有共幹高官才會「致崇高敬意」的警隊,但就日日畀人鬧係「黑警」及「黑社會」,去到邊度都俾人趕,入到茶餐廳就俾人問係咪要食Dog餐,這究竟反映了什麼問題?政府究竟識唔識檢討一下?香港那些警察究竟仲有冇反省能力?特首、政務司長及其他官員鸚鵡學舌,說支持警察「止暴制亂」的時候,知唔知道自己講緊乜嘢?是否有能力認清楚,最傷害香港的「暴」來自那裏?「亂」又是由何造成?

廣告

相對而言,那些日日俾警察追打的年輕人及示威者,卻顯得可愛得多。所以,依家你話叫和理非同示威者割𥱊?要真正「止暴」及「制亂」,特區政府及北京當局,應該首先要有「周處除三害」的精神!與其想和理非跟勇武割𥱊,不如政府先跟「暴政」及「警暴」先割𥱊啦!

老實講,我對於破壞地鐵這種做法,其實真係好有保留,我亦唔覺得需要衝擊警察宿舍。我old school,始終認為盡量唔應該主動以暴力手段作表達,破壞公物亦只會流失支持,其實亦唔覺得有必要咁做。何必為政府提供籌碼?有關這些衝擊動作的片段日日在大陸啲傳媒及微博上傳來傳去,對爭取擴大支持基礎真的弊多利少。

廣告

一旦被拘捕,也有可能面對長遠影響。我為此感到不值。我亦好擔心示威者以勇武的手段作回應會受到那些畜牲、藍絲、黑幫及暴警傷害(這幾類人真係要𢲡埋來講,佢哋都係同一類貨色)。

但到了今時今日,日日見到啲警察不守紀律、不守法、不守警察通例,打完人唔需要負任何後果,施暴完全唔需要負上法律責任。打嘅時候就當正啲中學生、青年人係殺父仇人。以為警察大晒,其實啲態度同行為重惡劣過爛仔。政府竟然對如此的警暴行為不發一言,仲要日日開個「警謊」記者會來公開展示所謂執法者有幾虛偽無恥兼且污糟邋遢。真係睇到都十分氣憤兼且不齒。

咁多香港人舉住美國國旗去到美國領事館,原來唔係抗議美國佬做咗啲乜嘢!係要求美國佬做啲嘢去懲罰自己嘅政府!真係充滿黑色幽默!美國領事館喺邊度都預咗俾人衝擊㗎啦!係喺香港先至會咁受歡迎。如此局面,邊個造成?環球時報懶有型,比喻話係啲「雞仔走去搵黃鼠狼」保護!佢知唔知在香港人心目中,如果美國真係黃鼠狼,中共就係豺狼,而特區政府就係同隻豺狼「狼狽為奸」嗰隻走獸!其實應該首先檢討下自己點解咁趕客!

今朝七點幾,揸車去到佐敦道拔萃女校一帶,已經一條長長嘅人鏈,轉入覺士道一直去到柯士甸道口,都係十幾歲至二十多歲嘅年輕人,其實真係好感動。

睇到咁多中學生走出嚟,只係用咁溫和、和平嘅方式來表達佢哋嘅訴求,其實就算唔同意訴求本身,都應該予以肯定。對於年輕一代主動積極咁表達自己嘅想法,任何為人師長、長輩、父母、甚至官員,都應該為年輕一代有咁嘅主動性及積極性而感到欣慰。有乜人會希望自己嘅下一代全部都變鵪鶉?

一早起身,做啲咁嘅嘢為乜?只係表達,要傳遞一個訊息。如果啲政府官員、大人,繼續詐睇唔到,都冇乜辦法。但點解要搵嘢掟傷佢哋?點解要攞𠝹刀出嚟追殺佢哋?跌咗良心嘅都唔止係警察!今時今日香港地,跌咗良心嘅人真係比想像中多。

幸好在這些學子身上,在年輕人身上,我仍然見到希望。

如果要割𥱊,我首先就同政府及這樣的警察割𥱊。其實有時我諗,如果我在當場,我可能都會忍唔住郁手還拖。如果我個仔當差做到咁,我即刻同佢脫離父子關係。咁樣嘅政府,仲叫我支持?咁嘅所謂「撤回」,林鄭月娥話希望可以令中間派收貨,不再支持示威者。佢真係離地到就嚟升上月球同月中嫦娥相認。就快中秋,真係求下你唔好影響佢嘅形象!以為會有好多中間派會收貨?以為咁就可以收買到和理非?政府真係妄想!

想市民與示威者割𥱊?政府知唔知道除咗中學生呢條人鏈之外,香港人已經形成咗一條打10號風球都打唔斷嘅無形人鏈,把人心緊扣在一起了!

 

原刊於作者 facebook

發表意見