立場新聞 Stand News

繼續撐林榮基,係講天地良心,唔係講功利囉!

2016/6/20 — 17:57

失蹤超過半年的銅鑼灣書店店長林榮基,6月16日傍晚舉行記者會,講述被中央拘留的經過。

失蹤超過半年的銅鑼灣書店店長林榮基,6月16日傍晚舉行記者會,講述被中央拘留的經過。

早兩日林榮基爆料後,充滿睿智的熱普城國師率先指出,中共放林榮基落來爆料,係谷七一遊行人數,係泛民九月選戰的救命草,是中共的陰謀,咩見佢搵何俊仁已經知,其同樣充滿大智慧的熱普城意見領袖立即廣傳並贊同,更有人指林榮基是泛民、左膠最新的人血饅頭。

點知,林榮基接受Channel NewsAsia訪問時指,香港獨立係出路而且可行。嘩,跟住成班熱普城的支持者及意見領袖,紛紛廣傳,林榮基由中共的陰謀、泛民救命草和人血饅頭,一夜之間變成港獨代言人,有啲人仲好好意思咁畫埋漫畫,寸「我們都是林榮基」的人依家點算?反問左膠泛民點算?仲支唔支持林榮基好?嘩係,點解將一個你哋精神領袖奉為「中共陰謀、人血饅頭」嘅人在三日間就捧為港獨代言人?你哋唔會面紅又唔會唔好意思嘅?你哋又好意思反問泛民左膠嘅?

廣告

唔使再問泛民左膠「仲撐唔撐」、「仲係唔係林榮基」、「點算好」,泛民左膠即使膠,但都有道德有良心,唔係好似某些人咁,果個人冇利用價值時,是陰謀、是人血饅頭,有利用價值時,就是自己的英雄,自己信仰的代言人。見到中共把林榮基一眾人整成這樣,把香港搞成咁,就已經值得香港人撐,佢撐唔撐港獨,唔關我事,繼續撐佢係講天地良心,唔係講功利囉!

 

廣告

標題為編輯所擬;原刊於作者 facebook

發表意見