立場新聞 Stand News

罷工的秘密?

2019/11/7 — 22:55

遊走工運多年,身處過不少罷工基地。上星期梁繼平發表咗一篇文講工會同罷工,他的解述寫得很好。逆權運動由六月到而家,我哋都討論好好多次罷工,好多人都想組織一次成功的罷工。但係罷工完全沒有捷徑可言,秘密就只有一個:準備。

咁要準備啲乜嘢呢?可以好多亦可以好少。多嘅話:會費有預備罷工基金未?會員大會開咗幾多次?授權點樣罷工?談判隊預備好未?罷幾耐?有冇 pattern?罷工基地嘅硬件預備好未?文宣隊預備成點?仲有可以好多……

因為:你想成功係咪?咩叫準備得好呢?2010 年,筆者去過一場英國工會 Unite 的會員大會,這次罷工前的大會,一次過有 3,600 個會員出席!要借當地馬場至夠大容納咁多人。

廣告

一般的經濟型罷工,以勞資爭議為主,很多時候需要長時間的預備。有些工會可能要一兩個月去進行會員解說、啟動罷工投票程序。十年前我經歷過的大罷工,工會差不多用了一年的時間準備。而罷工(或工業行動)和談判,往往是雞先定蛋先的問題。黃金法則之一:要求談判前要有行動嘅準備。行動通常係用來 backup 談判。所以好多時會見到有些工會宣佈:談判破裂,即刻罷工。而談判嘅過程亦話俾啲會員知,公司驚嘅唔係談判代表,而係驚代表後面班人 — 罷工人數。

但在某些工作間,不會成日有咁多時間準備,亦都有時係無乜要準備,話罷就罷,呢種罷工好多時會來也匆匆去也匆匆,爭議嘅項目會較單一或少。不過有冇談判都好,都一定會有人問:會唔會炒魷魚㗎?我答你喔:會㗎!咁係咪要保證唔炒先至罷工?咁就唔好研究喇,返屋企瞓啦!

廣告

不過上面所講嘅,始終係經濟型罷工。同政治性質罷工係點都唔同。政治性嘅罷工,無談判隊或者相關行動唔出奇,因為「五大訴求」已經好清楚,大家一條心要向政府施壓,但係就要全民克服「好驚炒魷魚」同白危恐怖嘅心理關口,係要全民齊心先至得。於是,要準備嘅嘢就更實際,要令可能出現嘅問題唔係問題。唔容易㗎,但係多啲人商量就可以克服得好啲。

咁要點樣準備呢?香港人要一齊諗㗎!

 

作者 Facebook

發表意見