立場新聞 Stand News

羅冠聰被襲 葉志偉否認受僱示威:你咪去查 我都想收吓 有冇人介紹呀?

2017/1/10 — 13:22

葉志偉前晚帶隊示威、襲擊行動,背景圖片來源:羅冠聰fb

葉志偉前晚帶隊示威、襲擊行動,背景圖片來源:羅冠聰fb

香港眾志立法會議員羅冠聰前晚由台灣返港時遇襲,有報道指,帶隊示威的是香港旅遊從業員聯會主席葉志偉。葉志偉今早於商台節目否認自己受僱,又指羅冠聰佔中和踢篋,令遊客對香港卻步,很多人對他「恨之入骨」。葉又指羅冠聰提倡港獨,但在主持多番追問下,都未能舉出具例子。

有報道形容葉志偉是當日襲擊行動的領軍者之一,但他於節目中不認是示威的負責人,但承認有導遊和領隊對羅很不滿,他身為領袖所以要過去。葉指,羅冠聰參與佔中和踢篋行動,令遊客對香港卻步和令很多人「無得撈」,故對他「恨之入骨」。葉否認自己受僱,又指施襲者並非他們的人。

羅冠聰在節目中表示,若當日真的有人受僱收錢示威,警察是應調查的,葉即回應:「咁咪去查囉,冇收(錢)過就係冇收過,你咪去查囉,我都想收吓,有冇人介紹呀羅生?」

廣告

而主持澄清羅並沒參與踢篋,葉就指羅涉及「港獨」,但在主持和羅冠聰多番追問下,葉始終未能提出羅提倡「港獨」的具體例子:

主持:踢咇其實他們無份,佔中他就唔會否認,咁其實你哋今次表達的意見.....
葉:佢播緊港獨嘅時候,我身為一個香港人,呢啲就真係搞衰香港。
主持:啱啱佢都澄清佢唔係港獨。
葉:佢用啲語言偽術,喂,你做啲乜嘢,我哋知吖嘛。
主持:咁佢做咗啲乜嘢令人覺得佢係港獨。
葉:佢表達一路以嚟都係咁嘅訊息架啦。
主持:例如呢?
羅:我都想知我講嘢點會令人有啲誤解,不如講清楚啲,唔好舉一啲似是而非的說法出嚟。
葉:似是而非嘅嘢呢,就係你用緊語言偽術,包裝緊你,就話自己唔係唔係。
羅:你畀一啲具體嘅例子,我都想知我自己的表達到底點解令人誤會。
葉:唔係。仲有一樣嘢,我想澄清一樣嘢,呢個世界唔係「黑就係白」,同你意見唔同呢,就話人哋係收錢係點,我覺得呢樣嘢......
主持:可以舉例,令聽眾都明白,你覺得羅冠聰係提倡緊港獨,個例子係咩呢?
葉:我而家話返一個中心嘅思想,就係佔中有做,佢淨係呢一樣,第一樣就死罪啦。
羅:你覺得佔中就代表港獨?
葉:佔中,你表達訴求就應該和平理性,如果你咁做的時候。
羅:你都會譴責昨日(應為前天)襲擊我的人?
葉:你覺得,人哋咁做就唔得,你做就係正義?係咪咁嘅意思?
主持:你認同嗰晚機場行動,係非理性、襲擊的行動。
葉:呢啲的行為,我係絕對唔贊成的,我去嘈佢,佢去舉牌,佢鬧佢,我一得閒都會去做,但係我哋係守法。
主持:我哋去返最關鍵嗰點先,羅冠聰港獨的例子?
葉:嗯?
主持:港獨的例子,你覺得佢係港獨吖嘛。
葉:呢個呢,暫時唔想再討論。

廣告

葉志偉又指,羅去台灣是「你港獨同台獨去交流吖嘛」,但羅強調,他到台灣是作選舉和議會工作上的交流,而他主張的是香港人要自主自決。

發表意見