立場新聞 Stand News

而家要做嘅,係吸走建制派嘅票

2016/8/28 — 12:21

資料圖片

資料圖片

本文原刊作者facebook專頁

對於每日上兩三個鐘網、或者有留意時事嘅人,下星期日(9月4日)立法會選舉,你多數有投票意向。

網上世界,只係現實世界嘅一小部份,最多20-30%人口;而一啲網界嘅大事,知嘅更加係網上世界嘅一小部份人,大概係20-30%網民。計返,喺Facebook乜嘢驚天地泣鬼神嘅事,知嘅只係整體人口嘅4%-10%。我哋點打飛機,自我感覺良好都好,對其餘投票人士以至選舉結果嘅影響,微乎其微。特別係老人家、中年人士,一係唔投票、一係就就建制,你喺網上射到一地都係,都係接觸唔到佢哋。

廣告

呢幾年每逢選舉,我都會做一樣嘢:打畀啲親戚,特別係啲唔一定會投票、或者知佢會投建制派嘅,叫佢投畀非建制候選人。

我阿婆今年八十幾歲。上屆立會投票之前,我打去問佢打算投邊個……佢答我「田北辰」。我吐出嚟啲血幾乎穿過電話吐到去佢面前。為咗說服阿婆,我同佢講咗個真人真事:姓田嘅呢條友試過母親節嗰日-星期日嚟,留公司(即係豬1999+1)啲員工喺公司開會,搞到好多人無得慶祝母親節。

廣告

阿婆講咗句:「乜佢咁衰嫁?搞到人無得慶祝母親節。」阿婆係七個仔女之母,一聽到無得慶祝母親節,我知我成功了。

我打蛇隨棍上,叫佢聽佢孫仔話,投畀梁耀忠。

於是我阿婆投咗畀梁耀忠。梁耀忠,係當選嘅。

早前區議會選舉,一樣重施故技。雖然我叫阿婆投嗰個選唔到,但我知道,起碼我試過、盡過力。

阿爸一家三口,住九龍東。上屆立會阿爸同佢老婆有票,建議投畀黃洋達,佢哋連黃洋達係邊個都未知就投咗畀佢;今屆區議會,細佬都有票,佢哋兩母子自動自覺投畀民協嘅人。

老竇嗰排身體麻麻,冇去投票。嗰日下午,我專程去九龍城陪老竇行去票站,半接半夾佢投票。

由佢屋企行去票站,路程廿分鐘。中途每見到民賤聯嘅街站,佢就喺我身邊喪鬧:

「民賤聯嗰啲正爛坦嚟……(下刪三百字粗口,順帶一提,我啲粗口係佢教我嘅)」

記憶中,我哋兩父子從來未試過一齊行咁遠嘅路,有咁多嘅對話。今年我都會去陪佢投票。

───

人人都有老竇老母;喺老人院嘅公公婆婆,好多都有孫仔。每逢見到掌心雷呀、老人院種票呀,我就問,點解佢哋啲孫唔去關心下佢哋,畀個建議佢哋去投票?即使你平時點樣唔理佢,啲仔女、啲孫講一句,好過街外人講十句。

我只係希望大家,不論你支持邊個,唔好淨係用社交平台去表達你嘅支持。Facebook好重要,係香港頭號社交平台.......但其實只係一個好細嘅世界,reach到嘅人來來去去嗰三五萬。

已經前前後後講咗幾次,希望你可以做以下幾樣嘢:

1. 搵出你身邊嘅選民嘅朋友,whatsapp佢哋。唔好喺group whatsapp,逐個逐個發訊息問。唔熟嘅提醒佢投票、熟嘅咪說佢投畀某某。

2. 打畀你嘅年長一輩。問下佢哋投乜,然後動之以誠,叫佢哋唔好投畀某建制派、或者用孫嘅身份求下佢哋投畀某非建制派。講咗好幾次,呢招對老人家,係work嘅。呢幾次選舉,阿婆去田氏嗰票都畀我界走。

一個人諗唔晒全部方法。我只係覺得,當Facebook一打開全部係支持某某嘅貼,好容易令人有感覺係某某勝算好大/大咗好多。可惜而家係全民選舉義工嘅年代,你無退縮嘅餘地。人哋做呢啲地區工作、透過地區滲透一票一票拎返嚟,再透過種票+轉移選民,選舉工程制度化咗好多年;而非建制派只係能夠透過event-driven去拎支持。

你唔行多步,輸硬。

唔好怕面矇,怕人拒絕你、怕人問你點解要投某某。你要說服人,就要做功課,徹底認識你推介嘅人有乜嘢好/對家有乜嘢唔好。呢啲嘢,你做第一次之後,第二第三次就好得心應手。你可以諗清楚,為咗你支持嘅人,可以去到幾盡。唔使話我知,自己諗清楚自己嘅位置同能力,just do it.

上次區選,有好幾個候選人只係輸少於廿票。如果有人肯打多個電話、發多個訊息,結果已經唔同。任何選舉,你能夠搵到一票游離票/無打算投票嘅人,或者吸走一張對家嘅票,已經係好叻仔-因為比起你原本得一票,你嘅influence 係多咗一倍。記住,香港立法會選舉嘅投票率一向只有約50%,即係另外嗰50%根本無投票。

你肯打個電話、發個訊息、撥兩個鐘飲餐茶,一票變三四票;一百人肯做,一百變三四百票;一萬人肯做,一萬變三四萬票;一百萬人.....耶穌同孔子都講過:千里之行,始於足下。

朋友親戚唔係任你擺布,只係你講得出理由,又用埋友情/親情牌,好多人會真心支持你。我得一票,打電話打咗幾年,今年郁到嘅票,真係有十幾廿張。但咁係唔夠-我哋面對嘅係官黑商嘅惡勢力,一定要做得更多。

由今日開始,我每日會說服一個投建制、或者未必100%會投票嘅人,嚟緊星期日投畀非建制派。頭號目標,係往年投畀民建聯嘅幾個阿姨姨丈-佢哋共有五票。

你既然相信自己嗰票make a difference,點解唔試下,make a larger difference?

*   *   *

不要問,只要like,仆街史兄的專頁同IG。
Facebook : https://www.facebook.com/Relgitsjg
IG (主要用嚟睇女仔) : https://www.instagram.com/iamuncleshit/

發表意見