立場新聞 Stand News

聖誕監粗嚟的故宮大禮

2016/12/27 — 9:19

「香港故宮博物館」簽約儀式(政府新聞處)

「香港故宮博物館」簽約儀式(政府新聞處)

港府在從沒諮詢公眾及立法會下,日前突宣佈與北京故宮博物院合作,在西九文化區「加建」故宮文化博物館,由賽馬會出資35億元興建,明年下半年動工,料2022年開幕。呢個消息嚟得好突然,連西九管理局成員都後臨尾先被知會,聖誕佳節香港人「被送禮」,都唔知好嬲定好笑。

西九故宮文化博物館同過往故宮展最大分別是這應該是個常設的展覽,專門展出故宮文物。香港近年睇大陸文物展已多不勝數,雖然建設費由馬會出資,但之後的經常開支由要由香港人負責,究竟689、林鄭丶劉江華一幫人有冇問過香港人,如果有三十幾億可動用,究竟大家想點?有冇其他選擇先?

呢壇嘢當然係政治工程,內地見香港年輕人分離意識愈演愈烈,出於文化統戰的需要,才有突然僭建故宮西九分店之舉。分店之所以是僭建,係因為西九文化區之建設,係經過長時間諮詢過程,幾上幾落,並且有大量公眾參與的表達意見機會。故宮分店尤如買個LV手袋返嚟再自行加條金龍,原本是立足香港丶面向國際的文化藝術區,故宮文物並非香港本土,要睇都去北京故宮,單係明朝留下的宮殿已值回票價,如果要睇堅料真文物,首選自然去台北故宮,香港不過是北京故宮分店,有何吸引力?

廣告

如今西九變成一棵聖誕樹,因此例一開,只要有權有勢,或內地交託政治任務,就可以掛上去,最後變成山寨版文化區,失去了定位及品味一致性,假如有一日又有人認為港獨氣焰高漲,要向香港人宣傳中華民族偉大復興故事,不如又整個北京中國歷史博物館(近代史)西九分店,將原本革命博物館的收藏在香港西九作常設展出。近年呢種以文化統戰為主的活動,已經好難頂,今年七月會展舉行香港書展,無厘頭擺壇「一帶一路文物展」,騎呢之極。

西九本來是展現香港作為國際文化大都會的形象,所以才有M+的建設,如果要突顯香港文化,除了現代藝術外,應該將香港作為華人流行文化之都的地位抬高,香港電影丶流行音樂丶漫畫丶小說丶傳媒,先至係本土特色。有人提議設李小龍博物館,我舉腳贊成之餘,並希望擴闊成為「功夫博物館」,網羅明星丶動漫丶電影丶小說等媒介,肯定獨步全球。

廣告

退後一步來講,即使面向內地遊客市場,就更應突出香港文化作為主體。內地各省市博物館有大量呢類「故宮展」,尤如兵馬俑展仲有乜人會去睇。內地人一樣想睇國際級文化藝術展,去年香港地產商新世界在上海K11商場舉辦法國印象派莫奈作品展,轟動滬上。如果真係想請國際名牌來西九開分店坐鎮吸金,由俄羅斯聖彼得堡隱士廬博物館丶巴黎羅浮宮丶奧賽美術館,排到倫敦大英博物館丶Tate Modern、紐約MOMA,點計都冇可能係北京故宮博物院。北京故宮文物收藏的精品在1946年不少已經被運到台北,近年北京展來展去都是滿清皇室用品,鮮有拿出中國文化重要文物展出。

香港人聖誕節忽然「被送禮」,恐怕只是開始,往後文化統戰陸續有嚟,睇到一般人厭為止,就再組織中小學生排隊去學習中國文化歷史!

(原刊作者FACEBOOK專頁

發表意見