立場新聞 Stand News

聽日,一齊去維園「跟隊」!

2019/6/8 — 22:38

年中踢過唔少 league 比賽,但有一場波好深刻。

嗰場比賽開波前 30 分鐘仲係得 10 個人(11 人場),已經唔夠人之際仲要臨時有球員放飛機。開波 11 個都未夠,出席嘅球員當中有幾個只係諗住完場前出十零分鐘嘅老鬼,而家要打正選踢全場,對方仲要係榜首球隊,大家都心慌慌唔知點算,但隊長一句:「9 個咪 9 個,照打,每人走多步,驚佢呀?」

呢位隊長已經 5 張嘢。

廣告

我唔知佢係真係唔怕輸定充大頭鬼。9 打 11 喎,大場喎,但年過 50 嘅佢唔怕輸、唔怕攰、唔怕要捱打都要打落去,除咗有鬥心之外,我諗唔到點樣去形容。

不過,最後我哋場波都係輸咗,但唔係大比數輸,而係僅輸 2-0,兩球都係上半場失,而下半場對方攻極都攻唔入。場波輸咗,但我哋成班波都覺得已經贏咗,點解?因為我哋用行動阻止咗一場,原本可以開「主其他」嘅比賽變成一個唔算難睇嘅結果。

廣告

有時候未踢嗰陣你可能知道場波要贏根本難過登天,但幾難踢都好,唔代表要未踢先認輸。明知都會輸點解仲要螳臂擋車力戰到底?為嘅已經唔係勝負,而係尊嚴。

尊嚴就係你明知會輸都要傾力一戰,用最大努力阻止最壞嘅情況發生。

雖則有尊嚴地輸同放棄地輸都係輸,但至少你知道你有盡過力去爭取、去抗爭、去奮鬥,結果就算唔係你預期,大家能做嘅已經做哂。

等死定垂死掙扎自己選擇,但我可以話你聽,只有由一開始就已經放棄乜都唔做嘅人,係最無資格怨有呢個結果,因為你嘅決定已經代表你有咩結果。

我唔知聽日場波有幾多人會出現、有幾多人會飛機,但肯出現嘅都係因為唔想認輸啫。

聽日,一齊去維園「跟隊」!

 

作者 Facebook

發表意見